आइतवाः २ बजे प्रमया चुनाव
माओवादी व कांग्रेस उम्मेदवार दथुइ धेंधेंबल्लाः
येँ (सन्ध्या टाइम्स)/दलतय्सं सहमतीय सरकार दयेके मफयेवं न्हूम्ह प्रधानमन्त्री ल्ययेत आः बहुमतीय प्रक्रियाय् हे वनीगु जूगु दुसा उकिया लागिं आइतवाः व्यवस्थापिका संसदय् २ बजे चुनाव याइगु जूगु दु ।
थौं सुथय् च्वंगु संसदीय कार्यव्यवस्था समितिया बैठकं आइतवाः प्रधानमन्त्री ल्ययेत चुनाव यायेगु निंतिं माःगु तयारी याःगु दु। कन्हय् प्रधानमन्त्रीया उम्मेदवारपिनिगु नां दर्ता यायेगु अले कन्हय् हे अन्तिम नां धलः पिकायेगु नं कार्यव्यवस्था समितिया बैठकं निर्णय याःगु दु। कार्यव्यवस्था समिति धइगु संसदया प्रक्रिया न्ह्याकेगु निंतिं माःगु तयारी यायेत संसदय् दथ्याःगु फुक्क हे दलतय्गु प्रतिनिधित्व यानाः दयेका तःगु समिति खः। थौं न्हिनय् च्वनीगु व्यवस्थापिका संसदया बैठकं कार्यव्यवस्था समितिया उगु प्रस्तावयात अनुमोदन याइ धाःगु दु। थुगुसी ल्यइम्ह प्रधानमन्त्री मुलुकया ३५ म्ह प्रधानमन्त्री जुइ। थुगुसीया चुनावय् माओवादीपाखें उपाध्यक्ष डा. बाबुराम भट्टराई व कांग्रेसपाखें उपसभापति रामचन्द्र पौडेल दनादीगु जूगु दु ।
माओवादीं सहमतीय सरकारया नितिं नं भट्टराईयात हे उम्मेदवार दयेकूगु खःसा कांग्रेसं धाःसा सहमतिया सरकारया निंतिं शेर बहादुर देउवायात उम्मेदवार दयेकूगु खः। भट्टराईयात मधेसवादी पार्टीतय्सं समर्थन याइगु जूगु दु ।
कांग्रेसपाखें हाकनं पौडेल उम्मेदवार
नेपाली कांग्रेसं हाकनं प्रधानमन्त्री उम्मेदवारकथं रामचन्द्र पौडेलयात हे थनेगु निर्णय याःगु दु। कांग्रेसया थौं सुथय् च्वंगु बैठकं थ्व निर्णय याःगु खः। सहमतीय सरकारया नितिं कांग्रेसं शेरबहादुर देउवायात उम्मेदवार दयेकूगु खःसा चुनावय् वनेगु निंतिं धाःसा कांग्रेस विधान कथं संसदीय दलया नेता हे जुइमाःगु कारणं हानं पौडेलयात हे उम्मेदवार दयेकूगु खः ।
थ्व स्वयां न्ह्यः जूगु प्रधानमन्त्री चुनावय् १७ क्वः तक बूम्ह भाजु पौडेलयात थुपालय् धाःसा फयांफत्तले त्याकेगु जुइ धासें कांग्रेसं थीथी दललिसे वार्ता सुरु यायेगु निर्णय नं याःगु दु ।
