डा. भट्टराईयात वःगु मधेसवादीया समर्थन

सहमतिया सरकार गठन यायेगु 'प्रशस्त कुतः' जुयां नं अन्ततः सफल मजुइवं राजनीतिक दलत हानं बहुमतीय सरकार गठन यायेगु लँपुइ हे प्रवेश जूगु दु। बहुमतीय सरकार गठनय् नं थुपालय् संविधानसभाय् दुथ्याःगु फुक्कं धइथें मधेसवादी दलतय्सं माओवादीया डा. बाबुराम भट्टराईयात समर्थन यायेगु निर्णय याःगुलिं आः वय्कःया हे नेतृत्वय् बहुमतीय सरकार गठन जुइगु करिब निश्चित जूगु दु। यदि राजनीतिक पार्टीतय्सं दथुइ हे थःपिनि निर्णय महिल डा. बाबुराम भट्टराई न्हूम्ह प्रधानमन्त्री जुइगु पक्का जुल धाःसां जिल ।

डा. बाबुराम भट्टराईं न्हापा प्रचण्डया सरकारय् अर्थमन्त्री जुयाः यानादीगु ज्यां वय्कः प्रति आपालं सकारात्मक जनमत तयार जूगु दु। उकिं प्रधानमन्त्रीया रुपय् वय्कलं अझ बांलाःगु हे जक ज्या यानादी धकाः आशा यायेगु थाय् दु। तर अथे खयां नं वय्कःयात थौं आकाझाकां धइथें फुक्कं मधेसवादी दलतय्सं समर्थन याः वःगु धाःसा शंका यायेबहःगु खँ जुयाच्वंगु दु। मधेसवादी दलतय्सं थौंकन्हय् 'छगू मधेस छगू प्रदेश'या गुगु माग न्ह्यःने हयाच्वंगु खः, उकिं डा. भट्टराईयात कायल याइगु निश्चित दु। अथे हे तराई लागाय् हिन्दी भाषायात सम्पर्क भाषा दयेके माःगु, मधेसय् मेगु जनजातिया प्रदेश दयेके मदइगु, झिद्वः मधेसीयात नेपाली सेनाय् सामूहिक प्रवेश याके माःगु आदि मधेसवादीतय् माग नं सकसितं पाच्य जुयाच्वंगु मदु। लिसें मधेसवादी दलतय्त लिउने च्वनाः भारतं संचालन यानाच्वन धकाः वइगु द्वपंयात नं गहन रुपं बिचाः यायेमाःगु खनेदु। न्हूम्ह प्रमया निंतिं मधेसीया समर्थन नँयागु बजि न्ह्यये थें नं जुइफु ।

More Stories Like this