संविधानसभा म्याद थपया विवाद

छखे न्हूगु सरकार गठनया तयारी जुयाच्वंगु इलय् मेखे संविधानसभाया म्याद गय् यानाः व गुलि थपे यायेगु धइगु खँयात कयाः दलतय् दथुइ विवाद पिहां वःगु दु। दलतय् दथुइ जूगु सहमति कथं आः स्वला जक म्याद थपे यायेमाःगु खः। तर शान्ति प्रक्रिया व संविधान निर्माणया ल्यं दनिगु ज्या यायेत स्वला ई थपे यानां मगाः। उकिं खुला वा दछि थपे यायेमाःगु आवश्यकता दु। तर सर्वोच्च अदालतं यानातःगु छगू फैसलां यानाः आः संविधानसभाया म्याद स्वलां अप्वः थपे याये मदइगु जुयाच्वंगु दु। संविधानसभाया म्याद थपे यायेगु खँ जुयाच्वंगु इलय् राष्ट्रपति डा. रामवरण यादवं नं दलतय्त सर्वोच्चया उगु फैसला बांलाक ब्वनाः उकियात ध्यान तयेत इनाप यानादीगु खः। सर्वोच्च अदालतं यानाः फैसलायात हाचांगायाः वनेगु अधिकार छगू कानुनी राज्यया सरकारयात दइ मखु। थुकिं यानाः म्याद थपे यायेगु विवादं थाय् काः वःगु खः ।

राजनीतिक पार्टीतय्सं थौंकन्हय् शान्ति व संविधान दयेकेगु सवालय् गुकथं ज्या यानाच्वंगु खः उकियात स्वयाः धायेगु खःसा संविधानसभाया म्याद मेगु दछि थपे याःसां नं थुमिसं ज्या क्वचायेकीगु खने मदु। उकिं म्याद अप्वः थपे यानाः जक ज्या जुइ धकाः पत्याः यायेगु आधार आः मदयेधुंकल। दलतय्सं यानाच्वंगु ज्या खनाः वाक्क वःपिं सर्वसाधारण जनतां ला आः संविधानसभाया भंग याःसां जिउ धकाः तक नं अभिमत बीगु याना हयाच्वंगु दु। तर थ्व संविधानसभाया भंग यानाः नं समाधान लुइगु सम्भावना मदुगुलिं थुकियात हे अधिकतम उपयोग यायेमाःगु आवश्यकता दु। तर थुपालय् धाःसा दलत धाथें बाम्हय् काःगु दु ।

More Stories Like this