लं सुरुवाः राष्ट्रिय वसः खःला ?

लं सुरुवायात नेपाली राष्ट्रिय वसः वा पोसाकया रुपं मान्यता वीवं सर्वोच्चया गलत निर्णय प्रति नेपाली जनतां आक्रोष प्वंकेगु यानाहःगु दु । विशेष यानाः मधेसीवादी दल व अनया जनतां थुकियात कयाः विरोधया सः थ्वयेका हःगु दु । सर्वोच्च अदालतया प्रधानन्यायाधिश खिलराज रेग्मीयात नाप लानाः संयुक्त लोकतान्त्रिक मधेससी मोर्चाया नेतातय्सं सर्वाच्च गलत निर्णय याःगु खँय् ध्यान साःगु खः । लं सुरुवा राष्ट्रिय वसः जुइहे मफैगु व उगु निर्णय संविधान व नेपाःमि जनताया भावनाया अःखः जूगु वयकःपिनिगु निष्कर्ष खः । लं सुरुवाः धयागु खस ब्रम्हू व नेवाःतय्गु वसः खः । छगू कथं पाहाडीतय्गु वसः खः । अथ्य धकाः उत्तरया हिमालय् च्वनीपिं अले तराइ क्षेत्रय् च्वनीपिं जनतां नं लं सुरुवाहे फी धकाः धाये मज्यू । अन थःगुहे कथंया वसः पुनी ।

थुज्वःगु खँ सीक सिकं नं मात्रै छगू निगू जातिं पुनीगु वसःयात राष्ट्रिय वसःया मान्यता वीगु सही जुइमखु । तराइ मधेसय् च्वनीपि जनताया थःगुहे कथंया वसः दु थें हिमालय् च्वनीपिं सेर्पातय्गु थःगुहे वसः दु । विविध धर्म संस्कृति व भाषा भाषीत दुगु देशय् राष्ट्रिय स्तरया मान्यता वीत गम्भीर रुपं विचाः यायेमाः । देशया विविधता यात ध्यानय् तयेमाः । पञ्चायतकालिन मनस्थितिं छगू भाषा, छगू धर्म व छगू संस्कृतिया वकालत यायेगु व राष्ट्रिय मान्यता वीगु खँ आः सहज जुइमखु । विविधता जाःगु देशय् राष्ट्रिय मान्यता धयागु नं विविधतायात कयच्याइगु जुइ माः । छगू भाषा छगू संस्कृति व छगू जक वसः यात राष्ट्रियताया मान्यता काये नं मज्यू, बी नं मज्यू । छगू भाषा, छगू जाति, छगू संस्कृति व छगू धर्मयात सरकारी मान्यता वीवं मेगु भाषा, जाति, संस्कृतियात राज्यं हेला व अपमान याःगु जुइ । छगूयात मुलय् तयाः मेमेगु यात धलय् तयेगु ज्या आः सम्भव मदु । सर्वोच्चपाखें जूगु थुगु गल्तियात भिंकेगु स्वयेमाः ।

अथ्यला सर्वोच्च अदालतं निर्णय व्यूसां थुकिया वारे फैसलाया पूर्ण पाठ तयार जूगु नं मदुनि पिकाःगु नं मदु नि । वंगु भाद्र १ गते लं सुरुवायात नेपाली वसःया मान्यता व्यूम्ह सरकारया निर्णययात सर्वोच्चं सदर यानाव्यूगु खः । स्वम्ह मध्ये निम्ह न्यायाधिसया सहुमतं याःगु उगु फैसला नेपाःया व नेपाली जनताया भावना विपरित जूगु निष्कर्ष पिकाःगु दु । सर्वोच्चया उगु फैसलाया विरोधय् वइगु भाद्र ९ गते मधेसी जनतान्त्रिक फोरम -लोकतान्त्रिकं) फैसलाया प्रतिलिपि च्याके त्यंगु दु । थुकिया वारे थप विरोध व आक्रोस पिहां वयेन्ह्यः हे सर्वोच्चं थःगु गल्ति सच्चय् यायेमाः ।

छगूयात समर्थनयानाः मेमेगु यात अन्याः यायेमज्यू । विविधतां जाःगु नेपाली समाजयात सर्वोच्च नं उगुहे कथं थुइकाः फैसला वीगु यायेमाः । पुलांगु सोच व मानसिकता घानाः सर्वोच्च अदालत सम्प्रदायिक जुइके मवीत कुतः यायेमा । हिलावंगु देय्या यथार्थ व संस्कृतिया अध्ययन न्यायाधिशतय्गु पाखें नं जूइमा । मात्रै कितावी ज्ञान पर्याप्त मजुइफु । थ्व खँय् न्यायाधिशत सचेत व सतर्क जुइफयेमाः । अदालतप्रति म्हो जुयाः वनाच्वंगु विश्वासयात थनेगु माध्यम मेगु जुइमखु ।

More Stories Like this