नेपाली कांग्रेसय् झन हे गोलमाल

येँ (झीगु स्वनिगः)

सहमतीय सरकार गठन जुइवं बहुमतीय सरकारय् वनेमाःगु अवस्थाय् प्रमुख प्रतिपक्ष दल नेपाली कांग्रेसय् झन हे गोलमाल जुयावःगु दु । कांग्रेसं वरिष्ठ नेता शेरबहादुर देउवायात सहतीय सरकारया नितिं प्रधानमन्त्रीया उम्मेदवारया रुपय् थंगु खःसा आः बहुमतीय प्रक्रियाय् वनेवं छु यायेगु धकाः कांग्रेसया नेतातय्त ज्यामछिना वःगु दु । पार्टीया संसदीय दलया नेता रामचन्द्र पौडेल जुयाच्वंगु अले कांग्रेसया संसदीय दलया विधान कथं संसदीय दलया नेता हे प्रधानमन्त्रीया उम्मेदवार जुयाः चुनावय् ल्वायेमाःगु प्रावधान दुगु अवस्थाय् न्हापा नं याकःचा उम्मेदवार जुयाः नं तक्वः मछि हे चुनावय् पराजित जुयाः छगू कथं पार्टीयात हे ज्यामछिंगु अवस्थाय् वःगुलिं आः नं वय्कःयात हे उम्मेदवार यात धाःसा समस्या ब्वलनी धकाः छथ्वः नेतातय्सं नेतृत्वयात दबाव बियाच्वंगु दु ।

मेखे शेरबहादुर देउवा पक्षधर नेतातय्सं शेरबहादुर देउवायात हे बहुमतीय प्रणालीइ वनेत नं उम्मेदवार यायेमाः धकाः दबाव बियाः वयाच्वंगु सीदुगु दु । संसदीय दलया विधानंनिसें पार्टीया नेतातय्गु ल्वापु अले माओवादी व मधेसवादी नापं चिचीधंगु दलत मिलेजूगु अवस्थाय् गुगु नं हालतय् मत्याइगु जुयाः कांग्रेसय् अथे गोलमाल जूगु खः । कांग्रेसं आः छु यायेगु धकाः तकं धाये फयाच्वंगु मदु । मेखे कांग्रेसया छथ्वः युवा नेतातय्सं धाःसा माओवादी दक्ले तःधंगु दल जूगु नापं शान्ति प्रक्रिायाया जिम्मेवार छगू पक्ष जूगुलिं माओवादीया नेतृत्वय् हे सरकार दयेके बिइमाः धकाः नं धयाच्वंगुलिं कांग्रेसया नेतृत्वयात तसकं ज्यामछिना च्वंगु खः ।