अन्ततः न्हूगु सरकारया नितिं बहुमतया प्रक्रियाय् हे वन

माओवादीया नेतृत्व निश्चित

येँ (झीगु स्वनिगः)

राष्ट्रिय सहमतीया सरकार दयेकेगु मुक्कं यानाः झिन्हुया म्याद नं म्हिगः बुधवाः सनिलय् ५ ताः इलय् फूगु दुसा आः स्वतः हे न्हूगु सरकारया नितिं बहुमतीय प्रणालीइ वंगु दु । नेपाली कांग्रेसया इनाप कथं फुक्क दलत जानाः सहमतीया सरकारया नितिं स्वन्हुया म्याद थपे याःगु इलय् नं सहमतीय सरकार दयेके मफुगुलिं अन्ततः न्हापा न्हापा थें हे न्हूम्ह प्रधानमन्त्री ल्ययेगु नितिं व्यवस्थापिका संसदय् चुनाव हे जुइगु जूगु दु । ता ई न्ह्यःनिसें सहमतीय सरकार धाधां बहुमतीय सरकार दयेकेगुपाखे वंगु अवस्थाय् आः सु प्रधानमन्त्री जुइ ? छु पार्टीया नेतृत्वय् सु सु जानाः सरकार दयेकी धकाः मनूतय्सं न्ह्यसः तयाच्वंगु दु ।
आःया अवस्थाय् व्यवस्थापिका संसदय् दक्ले तःधंगु दल एकीकृत नेकपा -माओवादी) व मधेसवादी दलत नाप नापं चिची धंगु दलत जानाः माओवादीया न्वकु डा. बाबुराम भट्टराईया नेतृत्वय् न्हूगु सरकार दयेकीगु प्राय निश्चित जूगु दु धकाः मनूतय्सं तिप्पणी यानाहःगु दु । मधेसवादी दल चिचीधंगु दलतय्गु मत जक ल्याः खात धाःसां नं बहुमतसिबें अप्वः दुगुलिं आः माओवादीया नेतृत्वय् सरकार दयेकीगु प्राय निश्चित जूगु खः धकाः टिप्पणी यानाहःगु खः ।

संविधानसभाय् दुथ्याःगु मधेसवादी दल नापं झिंन्हय्गू दलत छसीकथं तमलोपा नेपाल, सद्भावना, संघीय सद्भावना, मधेसी जनअधिकार फोरम, फोरम गणतान्त्रिक, फोरम लोकतान्त्रिक, सद्भावना -गिरी), तमलोपा, नेकपा -माले), माले समाजवादी, नेकपा -संयुक्त) , जनमुक्ति पार्टी, नेपाः राष्ट्रिय पार्टी, स्वतन्त्र, दलित जनजाति , संयुक्त मञ्च, नेकपा एकीकृतं माओवादीयात समर्थन याइगु जूगु दु । थ्व हे दथुइ एकीकृत माओवादीया म्हिगः बुधवाः केन्द्रीय पदाधिकारीया मुँज्या च्वनाः बहुमतीय प्रणालीइ वंगु जूसां नं दलतय्गु दथुइ सहमती यानाः वनेगु नितिं दलतलिसे सहलह ब्याकाः वनेगु धकाः खँ क्वःछ्यूगु दु । अथे हे शान्ति प्रक्रिया नाप स्वापू दुगु विषय व संविधान निर्माणया विषययात कयाः थःपिनिगु नेतृत्वयया सरकार दयेकाः गुगु कथं न्ह्याः वनेगु धैगु विषयसं सहलह ब्याकेत थौं विहिवाः स्थायी समितिया मुँज्या च्वनीगु जूगु दु ।