भट्टराईयात मधेसीतय् समर्थन
सहमतीय सरकारया सम्भावना मंत, आः बहुमतीयपाखे
येँ (सन्ध्या टाइम्स)/मधेसवादी दलया समर्थन चूलाइगु लगभग निश्चित जूगुलिं आः माओवादी उपाध्यक्ष डा. बाबुराम भट्टराई नं हे सरकारया नेतृत्व याये खनीगु सम्भावना तीव्र जुया वःगु दु। सूत्रतय्सं बिउगु जानकारी कथं थौं सनिलय् सहमतिया सरकार गठन यायेत बियातःगु ई क्वचायेवं हे उपाध्यक्ष डा. भट्टराईनं प्रधानमन्त्रीया दावी यायेगु लागिं हस्ताक्षर मुंकेगु सुरु यानादी ।
एमाले व माओवादी दुगु बैठकयात कांग्रेसं बहिष्कार याःगु, मन्त्रिपरिषद्या बैठकयात माओवादीं बहिष्कार याःगु आदि घटनाक्रमं आः सहमतिया सरकार गठन मजुइगु निश्चित हे जूवंगु विश्लेषण राजनीतिक ख्यलं याना हःगु दु। डा. बाबुराम भट्टराईयात मधेशी जनअधिकार फोरमया उपेन्द्र यादव, फोरम गणतान्त्रिकया जयप्रकाश गुप्ता, तमलोपाया महेन्द्रराय यादव, स्वंगुलिं सद्भावनाया समर्थन वःगुलिं डा. भट्टराई न्हूम्ह प्रधानमन्त्री जुइगु निश्चित दुगु खँ सूत्रं धाःगु दु। यदि मधेसी पार्टी व चीधंगु दलतय्सं समर्थन यात धाःसा भट्टराईया नेतृत्वय् सरकार गठन जुइगु निश्चित जूवंगु दावी सूत्रं धाःगु दु। आः तक फोरम लोकतान्त्रिकया विजय गच्छेदार छम्हेस्यां जक समर्थन मयाःनिसा कन्हय् सरकार गठन याये माःगु अवस्था वल धाःसा गच्छेदारया पार्टी तज्याये नं फुगु खँ सूत्रं धाःगु दु। मधेसी मोर्चां माओवादी व थःपिनि दथुइ आपालं मुद्दा मिले जूगु व भट्टराईयात भारतया नं समर्थन दयेफुगु अनुमान यासें भोट बीत्यंगु खँ नं सूत्रं धाःगु दु ।
सहमतिया म्याद थौं फुइगु
राष्ट्रपति डा. रामवरण यादवं सहमतिया सरकार दयेकेगु नितिं बियादीगु म्याद थौं सनिलया ५ बजे फुइत्यंगु दु। अन्तरिम संविधानया धारा २३८ या उपधारा १ कथं वय्कलं न्हापां छवाःया म्याद बियादीगु खःसा दलतय्गु हे सिफारिस कथं हाकनं स्वन्हु थप याःगु खःसा। आः उगु थपे जूगु म्याद नं थौं फुइत्यंगु दु ।
५ बजे तक नं सहमतिया सरकार गठन याये मफुत धाःसा थौं हे राष्ट्रपति यादवं अन्तरिम संविधानया धारा १३८ या उपधारा २ कथं सरकार निर्माणया नितिं बहुमतीय प्रणालीइ वनेमाःगु जुइ ।
