धर्मोदय सभाय् भन्तेपिं !

अजय साय्मि

धर्मोदय सभा चुनाव विवाद

नेपाःया राष्ट्रिय बौद्ध संस्था धर्मोदय सभाया थुगु दँया निर्वाचनय् स्वम्ह भिक्षुपिं कोण्डन्य, धर्ममूर्ति व धम्मपालो भन्तेपिंसं महासचिव, कोषाध्यक्ष व कार्यकारिणी दुजः पदय् उम्मेदवारी बिउगु खबरं उत्पन्न जूगु हलचलं यानाः नेपाःया सकल बौद्ध धर्माबलम्बीपिनिगु ध्यान विशेष रुपं सालाकाःगु दु। थ्व हे निर्वाचनया बारे जिं छिगु न्हिपौया न्हिल्याः ने.सं.११३१ गुंलागा ४ स 'जिगु नं धायेगु दु' स्तम्भय् छकूचा खँ च्वयागु खः। अले जितः ज्याथा, येँया भाजु प्रणव तुलाधरपाखें न्हिल्याः ने.सं.११३१ गुंलागा ५ स लिसः वःगुलिं वय्कःयात यक्व सुभाय् देछानाच्वना।
भिक्षुपिंसं चुनाबय् ल्वाये जिउ लाकि मजिउ धकाः झी गृहस्थपिंसं निर्णय यायेगु उचित मजू थें च्वं। छाय्धाःसां भिक्षुपिनिगु जीवनयापनया अलग्ग हे नियम दु, विनय दु, अले आचार संहिता नं दु। गृहत्याग यानाः सांसारिक जीवनपाखें अलग च्वनेधुंकाः हाकनं प्रशासनिक पदय् च्वनाः संस्थाया दैनिक प्रशासन चले याः जुइगु धइगु वसपोलपिंसं धारण यानाबिज्याःगु चिबरयात ल्वःगु ज्या पक्का हे मखु। चिवरयात छुं नं प्रकारं श्रद्धाविहिन यायेगु सुं नं उपासक उपासिकापिंत तक हे ल्वःगु खँ मखु। चिवरधारीपिंसं छुं नं गल्ती यात धाःसा वय्कःयात भिक्षुपिनिगु विनय/पाराजिका नियम कथं कारवाही यानाः भिक्षुत्वं पदच्यूत याइगु खँ बौद्धजन सकसिनं सिउगु हे खः ।

भाजु तुलाधरं धयादी थें धर्मोदय सभाया स्थापना भन्तेपिंसं यानाबिज्याःगु खँ विवादया विषय हे मखु। थ्व सत्प्रतिशत सत्य खः। अले वय्कलं धयादी थें भन्तेपिंसं विहारं पिहां वयाः शिक्षा, स्वास्थ्य, विज्ञान, प्रविधि, साहित्य थेंज्याःगु क्षेत्रय् नं व्याप्त जुइमाः धयागु खँ नं विवादया विषय जुइ मखु। पवित्र चिवरयागु महत्व व सम्मानया सीमाय् च्वनाः वसपोलपिंसं न्ह्याथासं पलाः तया बिज्यायेफु। वसपोलपिंसं /उपासक/उपासिकापिनिगु अनुरोध वा निमन्त्रणायात स्वीकार यानाः जक ज्याखँ याना बिज्यायेगु विनयसंगत जुइ धयागु खँ नं लोमंके मजिउ थें च्वं। गथे कि धर्मोदय सभाय् वसपोलपिंत ससम्मान धर्मानुशासक, अध्यक्ष व सल्लाहकार पदय् च्वनाबिज्यायेत विधानय् हे स्पष्ट व्यवस्था जुयाच्वंगु दु ।

महासचिव पदय् च्वनीम्ह व्यक्ति संस्थाया समून्नतिया लागि साम, दाम, दण्ड, भेद आदि अस्त्र प्रयोग यायेमाःम्ह अधिकारी जुयाः हे नेपालय् बौद्ध धर्मया पुनर्स्थापना लिपा धर्मोदय सभाया संस्थापक श्रद्धेय भिक्षु अमृतानन्द महास्थवीरं धर्मोदय सभाया मन्त्री पदय् (आःया कथं महासचिव) नांजाःम्ह व्यक्तित्व प्राध्यापक सूर्य बहादुर शाक्ययात मनोनयन यानाबिज्याःगु खः। भन्तेपिंसं ल्वापुख्यापु (चाहे व निर्वाचन हे छाय् मजुइमा) स गबलें नं ब्वति काये मजिउ धयागु बौद्ध शिक्षा अनुसार हे थथे गृहस्थीयात प्रशासकीय पदय् मनोनयन यानाबिज्याःगु खः। नत्रसा उबलय् भिक्षु अमृतानन्द महास्थवीरं भिक्षु भदन्त आनन्द कौशल्यायन थेंजाःम्ह सुप्रशिद्ध बौद्ध विद्वान, धम्मालोक भन्ते, महानाम भन्ते, सुबोधानन्द भन्ते, कुमार भन्ते वा प्रज्ञारश्मि भन्ते आदि संस्थापक भन्तेपिंत प्रशासकीय पदय् छाय् मनोनयन याना बिमज्यात?

धर्मोदय सभायात बांलाक व सुथां लाक्क न्ह्याकेत सक्षम व कुशल नेतृत्वया आवश्यक जुयाच्वनी। प्रशासनया सर्वमान्य सिद्धान्त कथं संस्था संचालन याइम्ह प्रशासक अतिकं दक्ष व कुशल जुइ हे माः। थुज्वःगु सिद्धान्त विपरित गृहस्थ जीवन परित्याग यानाः बौद्ध धर्म सम्बर्द्धनया लागि विहारय् च्वनाः ज्या यानाच्वंपिं प्रब्रजित भन्तेपिंसं सांसारिक जीवनय् प्रवेश यायेगु कल्पना गथे यानाः यानाबिज्यात?

भन्तेपिनिगु शुद्ध आचरण अले प्रब्रजित जीवनयापन व समाजयात वसपोलपिंसं क्यनेमाःगु लँपुया बांलाक ब्यवस्थापन यायेत स्वनातःगु "अखिल नेपाल भिक्षु महासंघ" या समुन्नतिया लागि वसपोलपिनिगु सेवाया अतिकं हे आवश्यक जुयाच्वंगु दु। अथेला भिक्षु धर्ममूर्ति महास्थवीर स्वयम थुगु संथाया सचिव हे खः। थःगु धरातलयात निं दकलय् न्हापां सम्पन्न यायेमाः अले जक मेमेगु पलाः न्ह्याकेगु उचित जुइ। बर्मा, श्रीलंका व थाईलैण्डया भिक्षु महासंघया स्तरय् "अखिल नेपाल भिक्षु महासंघ" यात थ्यंका बिज्याहुँ। नेपाःया धार्मिक ख्यःया वसपोलपिंत थ्वहे नम्र निवेदन दु ।

More Stories Like this