हलिउडया ल्याटिन सुन्दरीत
थौंकन्हय् ल्यायटिनभाषी हिरोनीत व सेलेब्स हलिउडय् यक्व हे खने दयावःगु दु । इमिसं फिल्मया पर्दाय् ला हल्लाखल्ला याना-च्वंगु हे दु लिसें स्वकुमितय् माया नं कयाच्वंगु दु । 'सन सिटी' व 'फन्टास्टिक फोर'या शानदार सफलता लिपा हिरोनी जेसिका अल्बां गबलें लिफः स्वयाच्वने हे म्वाःलावन । वं मेक्सिसकन अबु व अमेरिकी मूलयाम्ह मांयात थःगु रंगरुप व प्रतिभाया आधार खः धकाः नालाच्वंगु दु । अले ल्याटिनया खँ पिहां वलकि वं गर्वया अनुभव यायेगु यानाच्वंगु दु ।
अमेरिकन टीभीया दकलय् लोकंह्वाःगु धारावाहिक 'डेस्परेट हाउसवाइफ' निसें चर्चाय् वःम्ह इभा लोंगोरिया न्हापांम्ह ल्याटिन मूलयाम्ह हिरोनी खः गुम्हेसित लोरियल ब्रँण्डया मोडिलंग यानागु वापत करोडौं दां ल्हातय् लाःवल । ५ फुट २ इंच तःधिकःम्ह थ्व बांलाःम्ह ल्यासेयात न्हापा मचाबलय् ल्याटिन जूगु कारणं हाकुगुलिं 'हाकुमैं' धकाः दक्वसिनं हायेकीगु जुयाच्वन । आः वयाः ईपं हे मनूत इभाया हितैषी जुइ धुंकूगु दु ।
क्यूबाय् जन्म जूम्ह इभा मेन्डिसं अभिनय क्षेत्रय् वये धकाः गबलें बिचाः हे मयाःगु जुयाच्वन । हाकुचा ख्वाः जुयाः छाइसे च्वंगु न्हाय् दुम्ह थ्व नच्चाम्ह ल्यासेयात छम्ह फोटोग्राफरं ग्लेमरय जगतय् दुहां वंसा छं नां व दां नितां कमे यायेफइ धकाः धयाबिउगु जुयाच्वन । अले ला व थःगु मार्केटिंग विषयया पढाई दथुइ हे त्वःताः अभिनय क्षेत्रय् दुहां वन । आः व दकलय् थिकेम्ह मोडल जुइ धुंकूगु दु ।
रोसेरियो डोभसनया जन्म ला न्यूयोर्कय् जूगु खः तर व पोर्टोरिकोय् ब्वलन । थःत वं अमेरिकन व ल्याटिन नितां भाःपियाच्वंगु दु । झिंखुदँया उमेरय् हे वयात छगू फिल्मय् मुख्य भूमिकाय् म्हितेत प्रस्ताव वःगु खः अले वयागु रुपरंग व अभिनययात दर्शकतय्सं तसकं ययेकल ।
अप्वः थें फिल्मय् खलनायिकाया भूमिकाय् खनेदयेकः वइम्ह मिशेल रोडरिक्सया परिवार नं पोर्टोरिकोय् हे च्वनीपिं खः । मिशेलयात थ्व खँय् गर्व दु कि व ल्याटिन अमेरिकन खः अले थःगु परिवारया नां तये फयाच्वंगु दु ।
पैज भिगा स्पेनय् च्वंम्ह खः । वं स्पेनिश फिल्मय् म्हिताः नां कमे यानाच्वंगु दुसा हलिउडय् नं वयागु खूब हे माग दु । पैजया मान्यता दु कि ल्याटिनीतय्गु रंग ला भचा हाकुइ तर सौन्दर्यय् ईपं ज्वः हे मदुपिं जुइ । धायेबलय् थुपिं थुपिं हे अज्याःगु ख्वाः खः गुपिं 'भुयूया मतू' धकाः धाइगु धापूयात गलत सिद्ध यानाः थःपिनिगु म्हगस साकार यानाच्वंपिं खः ।
- शेखर
More Stories Like this
फिल्मया पर्दाय् राजनीतिया खँ सिक्वेल फिल्मया लहर
