खुला म्याद थपे यायेगु प्रस्ताव
येँ (सन्ध्या टाइम्स)/ संविधानसभाया म्याद मेगु खुला थपे यायेगु लागिं सरकारं प्रस्ताव तयार याःगु दु। थौं सुथय् प्रधानमन्त्री निवास वालुवाटारय् च्वंगु सरकारय् दुथ्याःगु दलतय्गु बैठकं भदौ १४ गते संविधासभाया म्याद फुइत्यंगुलिं मेगु खुला म्याद थप यायेगु प्रस्ताव यंकेगु निर्णय याःगु खः ।
सरकारय् दुथ्याःगु दलत एमाले, माओवादी, मधेसी जनअधिकार फोरम नापं मेमेगु दलया नेतातय्गु बैठकं थ्व निर्णय याःगु खँ प्रमया प्रेस सल्लाहकार सूर्य थापां कनादिल। न्हूगु संविधान निर्माणया निंतिं स्वला जक म्याद थप यानाः ज्या पूवंके फइगु अवस्था मदुगु ठहर यासें खुला म्याद थप यायेगु निर्णय उगु बैठकं याःगु खः ।
सरकारपाखें प्रधानमन्त्री झलनाथ खनालं थौं हे च्वनीगु संविधानसभाय् दुथ्याःगु फुक्क दलतय्गु सर्वदलीय बैठकय् संविधासभाया म्याद खुला थपे यायेगु प्रस्ताव यंकीगु जूगु दु। सरकारं यंकीगु प्रस्तावयात सर्वदलीय बैठकं स्वीकृत यात धाःसा जक उकियात पारित याकेगु लागिं संसदय् पेस याइगु खँ धाःगु दु। आः संविधानसभाया म्याद थपे यायेगु लागिं अन्तरिम संविधानया झिक्वःगु संशोधन याये माली।
संविधानसभाया चुनावं सभासद्तय्त निदँया दुने न्हूगु संविधान जारी यायेत म्याण्डेट बिउगु खःसां इलय् हे संविधान तयार याये मफुगुलिं थ्व सिबें न्ह्यः झिंन्याला तक संविधासभाया म्याद थप याये धुंकूगु दु ।
संविधानसभाया म्याद फुइवं संविधानसभां हे न्हापांखुसी दच्छि अर्थात १२ महिना थप याःगु खःसा लिपांगु इलय् हाकनं स्वलाया म्याद थप याःगु खः। स्वलाया म्याद थप याःगु नं आः वइगु भदौ १४ गते तक जक खः। थुगुसी सरकारं कानुनी प्रक्रिया पूरा यानाः संविधानसभाया म्याद थप यायेगु निंतिं छवाः न्ह्यः हे प्रस्ताव यंकेगु योजना दयेकूगु दु ।
न्हापा निक्वः तक संविधानसभाया म्याद थप यायेगु लागिं अन्तिम इलय् चान्हय् जक प्रस्ताव यायेगु याना वयाच्वंगु खः ।
