नेवाः विरुद्ध हयेत्यंगु विधेयक खारेज जुइगु
येँ (सन्ध्या टाइम्स)/नेवाः स्वायत्त राज्यया अवधारणा विरुद्ध हयेत्यंगु 'काठमाण्डौं एकीकृत सहरी विकास विधेयक-२०६४' खारेज याइगु जूगु दु ।
म्हिगः भौतिक परियोजना मन्त्रालय सिंहदरवारय् भौतिक परियोजना राज्यमन्त्री देवी खड्काया अध्यक्षताय् नेवाः स्वायत्त राज्य मंकाः संघर्ष समितिया नेतृत्व व नेवाः सभासद्तलिसे जूगु सहलहया झ्वलय् नेवाःतय्गु माग कथं उगु विधेयक खारेज यायेगु बचं राज्यमन्त्री खड्कां बियादीगु खः। प्रस्तावित विधेयक संघीयता, स्वायत्तताया अधिकार विरुद्ध केन्द्रिकृत यायेगु नापं बस्ति विस्तारया नामय् मेट्रो पोलिटिनसिटी दयेका यंकेगु कुतः याःगुलिं थ्व नेवाः स्वायत्त राज्य विरोधी ज्या खः धकाः नेवाः नेतातय्सं खँ तयेवं राज्यमन्त्री खड्कां अथे खःसा उगु विधेयक खारेज यायेगु बचं बियादीगु खः ।
सहलह ज्याझ्वलय् नेवाः स्वायत्त राज्य मंकाः संघर्ष समितिया नेतृत्व नायः दिलबहादुर श्रेष्ठं यानादीगु खःसा संघर्ष समितिया अवधारणा संघर्ष समितिया सचिवालय कजि मल्ल के. सुन्दरं न्ह्यब्वयादीगु खः। ज्याझ्वलय् सभासद्पिं हितमान शाक्य व दिलीप महर्जन, सल्लाहकार डा. महेशमान श्रेष्ठ, गजेन्द्र मानन्धर प्रा. प्रेमशान्ति तुलाधर, पञ्चलाल महर्जन व अनुपसिंह सुवालपिंसं ब्वति कयादीगु खः ।
सहलहया झ्वलय् काठमाण्डौं सहरी विकासया नितिं सरोकारवाला थीथी सरकारी व गैर सरकारी संस्थातलिसे प्राविधिक नापं मेमेगु सवालय् समन्वय यायेगु निंतिं न्हूगु हे कानून मस्यौदा यायेगु अले उकिया नितिं नेवाः स्वायत्त राज्य मंकाः संघर्ष समितिलिसे सहलह ब्याकेगु सहमति नं जूगु खः ।
