नेपालभाषा मिसा खलःया नीनिदँ बुन्हि हन

येँ (सन्ध्या टाइस)/नेपालभाषा मिसा खलःपाखें बीगु कथं थुगुसी तिनि नीस्वंगु 'सबिता श्रेष्ठ नेपालभाषा सिरपाः' पाल्पाय् च्वनाः नेपालभाषाया सेवा यानाच्वनादीम्ह साहित्यकार चिनियालाल वज्राचार्ययात लःल्हात। मिसाया खलःया नीनिदँ बुन्हिया लसताय् याःगु छगू ज्याझ्वःया दथुइ उगु सिरपाः लःल्हाःगु खः। स्वनिगलं पिने च्वनाः नं बाखं, उपन्यास आदि च्वयाः नेपालभाषा साहित्यया सेवा यानादीगुलिं वय्कःयात उगु सिरपाः लःल्हाःगु खः। नेपालभाषाया च्वमि योगेन्द्रमान श्रेष्ठं थः मदुम्ह जहान सबिता श्रेष्ठया नामं स्वनादीगु उगु सिरपाः निदँय् छक्वः स्वनिगलं पिने च्वनाः नेवाः भाय्, कला, संस्कृतिया संस्कृतिया सेवा यानाच्वंम्ह व्यक्तियात बीगु जुइ। सिरपाः २५ द्वः तकाया खः। छेँ स्वनिगलं पिने खःसां स्वनिगलय् च्वनाः भाषा सेवा यानाच्वंपिंत धाःसा थ्व सिरपाः बी मखु ।

लिसें मिसा खलःया बुन्हिया लसताय् जूगु मिसा बाखं च्वमितय् बाखं कासाय् नःलि वज्राचार्य न्हाप लाःगु दुसा मीना वज्राचार्य लिउ, अपर्णा प्रधान लियांलिउ व भवानी तुलाधर व निजिरोस श्रेष्ठयात हःपाः सिरपाः लात।
नेपालभाषा एकेदमिया चान्सलर सत्यमोहन जोशी मूपाहां कथं झाःगु उगु ज्याझ्वः मिसा खलःया नकिं मंगला कारंजितया सभापतित्वय् जूगु खः। बाखं कासाया निर्णायकय् बाखं च्वमि शशिकला मानन्धर च्वनादीगु खः।
उगु हे ज्याझ्वलय् नेपालभाषा मिसा खलकं 'चम्पा टंक विलास बिजु नेवाः हःपाः सिरपाः' नीस्वनागु घोषणा नं याःगु खः। आकिवंनिसें उगु सिरपाः नं बियावं वनेगु खँ धाःगु दु ।