नेवाः हना सिरपाः रमापतिराजयात

येँ (सन्ध्या टाइम्स)/भाषा साहित्य मुँज्या खलः सक्वपाखें दँय्दसं बीगु याना वयाच्वंगु 'नेवाः हना सिरपाः' थुगुसी भाषाविद् रमापतिराज शर्मायात बीगु जूगु दु। नेपालभाषाया भाषाशास्त्र व व्याकरणया ख्यलय् वय्कलं यानादीगु योगदानया कदर यासें थुगुसीया थ्व सिरपाः बीगु निर्णय जूगु खः ।

नेवाः हना सिरपाः न्हापा झिद्वः तकाया खःसा थुगुसीनिसें नीद्वः तका याःगु दु। थ्वहे वइगु शनिवाः सक्वय् फ्रेण्डस् अफ साँखुया ज्याकुथी उगु सिरपाः लःल्हाइगु ज्याझ्वः दु।
थ्वहे झ्वलय् बाखंच्वमि मय्जु श्रीलक्ष्मी श्रेष्ठं च्वयादीगु बाखं सफू 'जिं लुइकागु बाखं' या अंग्रेजी अनुवाद जूगु दु। 'अ क्राइ इन द वाइल्डनेस एण्ड अदर शर्ट स्टोरिज' नापं पिदंगु उगु सफू नं अन हे विमोचन जुइगु ग्वसाः दु। बज्र बुक्सं पिथंगु उगु सफू तेजरत्न कंसाकार व केशरलाल श्रेष्ठपिंसं मंकाः कथं अंग्रेजीइ अनुवाद यानादीगु खः। ज्याझ्वलय् च्वमि श्रेष्ठया हे ताःहाकःगु कविता सफू 'शान्तिया शान्ति' नं विमोचन याइगु ज्याझ्वः दु ।