नेवाः प्रदेश मदुगु राज्य पुनर्संरचनाया खतरा

आः जुइगु राज्य पुनर्संरचनाय् यदि नेवाः प्रदेशयात चीकाः उकिया थासय् राजधानी प्रदेश वा अज्याःगु हे छुं अमुक नां तयाः नेवाःतय्त राज्यविहिन यात धाःसा अज्याःगु संविधानयात नेवाःतय्सं अस्वीकार यायेगु जुइ धकाः तःधंगु धाःगु दलया शीर्ष नेतातय् न्ह्यःने नेवाः न्ह्यलुवातय्सं स्पष्ट याःगु दु। नकतिनि जूगु नेवाः स्वायत्त राज्य मंकाः संघर्ष समितिया छगू ज्याझ्वलय् माओवादीया अध्यक्ष प्रचण्ड नापं नेपाली कांग्रेस व एमालेया वरिष्ठ नेतातय् न्ह्यःने हे नेवाः न्ह्यलुवातय्सं उगु ख्याच्वः बिउगु खःसा ज्याझ्वलय् वःपिं नेतातय्सं नेवाःतय्त राज्यविहिन मयायेगु प्रतिवद्धता नं प्वंका थकूगु खः। यद्यपि संसदया निगूगु तःधंगु दल नेपाली कांग्रेसं धाःसा राज्य पुनर्संरचना बारे हे बिचाः यानाच्वनागु जूगुलिं नेवाः स्वायत्त राज्य द हे दइ धइगु खँय् अझ नं ग्यारेन्टी मयाःनि। नेपाली कांग्रेस दुने नं च्वय्या पदय् च्वंपिं छुं नेतात जक नेवाःतय्त राज्य मबीगु पक्षय् दुगु खनेदु। खास यानाः बुद्धिजीवी पृष्ठभूमिया नेतात व स्वनिगःया सम्पूर्ण कांग्रेस कार्यकर्तात नेवाः प्रदेश दये हे माः धइगु पक्षय् दु। उकिं कांग्रेसं यदि नेवाः स्वायत्त प्रदेश बी मखु धकाः निर्णय यात धाःसा उकिं नेवाः प्रदेशया नेवाःतय्त आन्दोलित यानाः मेगु अशान्ति ब्वलंके बीगु जक मखु स्वयम् थःगु पार्टी दुने नं विग्रहया पुसा पीगु ज्या याइगु खँय् शंका मदु। उकिं ई दनिबलय् हे नेपाली कांग्रेसया प्रवुद्ध नेतृत्वं थुकिया बारे बिचाः याइ धकाः आशा याये। छुं जुयाः नेवाः प्रदेशयात राजधानी प्रदेश दयेकल धाःसा देशय् राजधानी प्रदेश ला दइ तर अन राजधानी धाःसा सञ्चालन जुइ फइ मखु, थ्व खँय् सकस्यां हेक्का वनेमा ।

More Stories Like this