मिस लिटिल नेवाः प्रकृति महर्जन

शीला साय्मि

'स्वास्थ्य, शिक्षा व धन मध्ये छिं छु ल्ययादी?' निर्णायकं न्यंगु थ्व अन्तिम न्ह्यसःया लिसलय् प्रकृतिं धयादिल, 'स्वास्थ्य !' थ्वहे लिसलं प्रकृति महर्जनयात थुगुसीया मिस लिटिल नेवाःया उपाधि चूलाका बिल।
नेप्लिज फेशन होम्सया ग्वसालय् जूगु 'खुक्वःगु मिस लिटिल नेवाः - २०११' वंगु गुंलाथ्व सप्तमी कुन्हु प्रज्ञा भवनय् जूगु खःसा कासाय् ब्वति काःपिं स्वीन्याम्हेसित लिफ्यानाः प्रकृति महर्जन उगु ताज त्याकेत ताःलाःगु खः।
उपाधि त्याके धुंकाः थःत छम्ह नेवाःया म्ह्याय् मचा जुयागुली गर्व ताःगु खँ कँसें प्रकृतिं धयादिल, 'आवंलि जिं बीगु थःगु म्हसीकाय् नेवाः तजिलजि व संस्कृति नं समाहित यायेगु जुइ ।'

थःगु आत्मविश्वासया कारणं हे सिरपाः त्याकेत थः ताःलाःगु धयादीम्ह प्रकृतिं गुगुं नं कासाय् सिरपाः त्याकेगु हे तःधंगु खँ मजुसे उगु कासाय् ब्वति कायेगु हे नं सिरपाः त्याकेगु स्वयां तःधं जुइगु बिचाः प्वंकादीगु दु। यदि थम्हं पलाः हे मन्ह्याकेगु खःसा उकी सफलता गुकथं चूलाइ धासें प्रकृतिं धयादी, 'दकलय् न्हापां ला पलाः तयेगु हे तःधंगु खँ खः ।'

थःत नेपालभाषाया प्रशिक्षण बिउगु ई लुमंकुसें प्रकृतिं थःत 'कुतः' खँग्वलं अप्वः प्रभावित याःगु खँ लुमंकादी।
भविष्यय् वनाः सफ्ट वेयर डिजायनर जुइगु आज्जु तयाच्वंम्ह वय्कःयात थुगु सिरपालं नेवाः जातिया म्हसीकालिसें नेवाः संस्कृति व तजिलजि च्वन्ह्याकेत फुगु पलाः न्ह्याकेत हःपाः चूलाःगु खँ नं कनादी। कासाय् ब्वति काये न्ह्यः नेवाः भाय् ल्हायेगु बानी मदुसां ज्याझ्वः थःत मां भाय्प्रति आकर्षित याःगु यथार्थ नं वय्कलं कनादिल। नेवाः संस्कृतिया विषयय् थम्हं कासाय् ब्वति काये न्ह्यः उलि मसिउगु जूसां कासाय् ब्वति कायेगु �वलय् थःपिंत बिउगु प्रशिक्षणं आपालं खँ सीकागु वय्कःया अनुभव दु। मेमेगु देय्या संस्कृति स्वयां झी नेवाःतय्गु संस्कृति पाःगु व झीसं नखःचखः छाय् हनेगु यानाच्वना धयागु विषयय् नं आपालं ज्ञां प्रशिक्षणया झ्वलय् कयागु खँ वय्कलं कनादी। आः झीगु संस्कृतिया संरक्षण झीसं हे यायेमाः धयागु खँ थ्व कासाया दौरानय् थम्हं वाःचायेकागु विचाः नं वय्कलं प्वंकादिल ।

अध्ययन लिसें थम्हं नेपालभाषाया पत्रपत्रिका नं ब्वनेगु याना च्वनादीम्ह प्रकृतिं थम्हं जक नेवाः भाय् ल्हायेगु सयेकेगु मखु कि थः पासापिंत नं नेवाः भाय् ल्हायेगुली आकर्षित यायेगु ग्वसाः यानाच्वनागु खँ नं कनादीगु दु।
विद्योदय इंग्लिस स्कूल दल्लुइ गुंगू तगिमय् ब्वनाच्वंम्ह वय्कलं थुगु कासाय् ब्वति कायेगु निंतिं दकलय् न्हापां ला थःगु स्कूलं हे ह्वःताः बिउगु खँ कनादिल। शिक्षक संजय सरं थःत आपालं ग्वाहालि यानादीगु खँ कँसें वय्कलं थःत हःपाः बिउपिं सकलसितं सुभाय् नं बियादिल। थः निनि छम्ह फेसन डिजायनर जुयाच्वंगुलिं वय्कःपाखें नं आपालं ग्वाहालि चूलाःगु खँ कनेगु वय्कलं ल्वःमंकामदी ।

म्येँ न्यनेगु व बाखं ब्वनेगु सोख दुम्ह प्रकृतियात प्याखं हुलेगु, चित्र च्वयेगु, क्वीज कन्टेस्ट व वत्तृत्व कला नं उतिकं यः। खुगून्ह्यगू तगिमय् ब्वनाच्वंगु इलय् वत्तृत्व कला व न्ह्यसः लिसः कासाय् वय्कलं न्हाप सिरपाः नं त्याकादीगु दु। एसएलसी परीक्षा लिपा 'मिस नेवाः' ज्याझ्वलय् नं ब्वति कायेगु वय्कःया भविष्यया ग्वसाः दु ।

More Stories Like this