विश्व बैंकं नेपाःयात हाकुगु सूचिइ तल

विकासान्मूख देय् नेपालं वैदेशिक त्यासा काःथे पुलेगु क्षमताया अभावयात कयाः विश्ववैंक नेपाःयात हाकुगु सूचिइ तःगु दु । विश्व वैंकं कुल राष्ट्रिय आम्दानी, कुल ग्राहस्य उत्पादन वृद्धि दर, निर्यात स्वयाः त्यासा, आयातया नितिं सांञ्चरित वृद्धिदरया चलाय् मान, सुद्रास्फीति व कानुन पालनाया आधारय् छुंनं राष्ट्रयात हाकुगु सुचीइ तयेगु ज्या याइ । नेपाः उगु खँया आधारभूत मूल्यांकनया कसिइ दकले कमजोर देय् खनेदुगुलिं विश्व वैंकं हाकुगु सूचिइ तःगु खः । विश्ववैंकं वंगु सञ्चवाः सार्वजनिक याःगु प्रतिवेदनय् उगु खँ न्ह्यथना तःगु खः । प्रतिवेदनय् न्ह्यःथना तःकथं नेपाःयात त्यासाया नितिं उच्चतम जोखिम दुगु धयातःगु खः । अथ्य धयागु नेपाःयात विदेशी वैंक संघ संस्थां अःपुक्क त्यासा व्यूथें त्यासा पुलेत थाकुइगु जक मखु, पुलेगु सामथ्र्यया नं अभाव जुइगुलिं हाइ डिफल्ट रिस्क धयातःगु खः । थुकथं हाकुगु धलखय् लायेवं नेपाःयात विदेशी ऋणया सम्भावना अतिकं म्हो जुयाः भविश्यय् त्यासा कायेत तकं थाकुइफु ।

विश्व वैंकं नेपाःयात हाकुगु सूचीइ तःसां नेपाःया आर्थिक विज्ञपिनिगु धापू धाःसा थुकिया पाय्छि अःखः दु । नेपाःया आर्थिक स्थिति उलि सन्तोष जनक मजूसां विगतया त्यासात पाखे स्वल धाःसा व फुक्कं इलय्हे पुलागु बांलाःगु रेकर्ड दु । खः वरु नेपाःया विदेशीत नाप व्यापारिक कारोवार सन्तोषजनक मदु । तर उज्वःगु कथंया मूल्यांकन सही मजूगु विज्ञपिनिगु धापू खः । थौं तक्कया दुने नेपालं त्यासा काःगु धलः स्वल धाःसा विश्ववैंक अन्तराष्ट्रिय मुद्रा कोष व एशियाली विकास वैंकयात त्वःता मेमेगु संघ संस्थायाके नेपालं त्यासा काःगुहे मदु । विदेशीतय्गु त्यासा काःगुली क्रमयात त्यासा पुलेगुली धाःसा छु ई लिवाःगु खनेदु । विश्व वैंकं थःगु प्रतिवेदनय् सोभर्न रेटिङ्ग धाइगु थुज्वःगु मापनयात न्ह्omने हइगु खः । थुकिं देशया आर्थिक प्रगतियात नं संकेट याइ । अन्तराष्ट्रिय लगानीकर्ता व त्यासा वीगु संघ संस्थां छुंनं देय्यात त्यासा वी न्ह्यः थुगु प्रविधि यात कयाः मूल्यांकन याइगु खः ।

विश्व आर्थिक मञ्चं नापं नेपाःयात थुगुहे कथं १३१ औं थासय् तया तःगु दु । थुकिं नेपाःप्रति धारणाय् नकारात्मक सोचया विकास जुइ । थुकिं ततःधंगु देय्त जक मखु, चिचीधंगु परिमाणय् लगानी याइपिन्त नापं ख्यायेगु ज्या जूगु दु । युद्धया मारय् लाःगु इराकया आर्थिक अवस्था स्वयाः नेपाःया स्थिति तसकं दयनिय् व ग्यानापूगु धायेत स्वःगु दु गनकि थ्व यथार्थ मखु । प्रतिवेदनय् न्ह्यागुहे खँ न्ह्यथनातःसां वास्तविकता मखुगुलिं सार्वजनिक जूगु खँय् विज्ञपिसं न्ह्यसः थनेगु यानाहःगु दु । प्रतिवेदन तयार यायेत सम्वन्धित देश व आया अर्थविद्त नाप सहलहः याःगु खनेमदु । थुकिं यानाः यथार्थपरक जुइमफुत । विवरण अनुमानया भरय् पिहांवःगु खनेदु । प्रतिवेदनया वारे अर्थमन्त्रालय् व अर्थशास्त्रीतय्त नापं जानकारी तकं मविसे एकतफिर् कथं पिकाःगुयात सही धायेफैमखु ।

More Stories Like this