स्वनिगलय् शहरी विकास यायेत सहलह

ये (झीगु स्वनिगः)

वंगु छुं दा न्ह्यो काठमाण्डौं उपत्यका शहरी विकास विधेयकया दयेके धुंका नं पारित यानां ब्यवहारय् यंके मफयाच्वंगु इलय् म्हिगः भौतिक योजना तथा निर्माण मन्त्रालयं स्वनिगःया नेवाःतय्त सःता सहलह याःगु दु । काठमाण्डौं उपत्यका शहरी विकास विधयेकया आवश्यकता व उकिंया औचित्यया विषयसं मन्त्रालय पाखें नेवाः स्वायत्त संघर्ष समितिया दुजःपिन्त सःताः ब्यवस्थित शहरी विकास गुकथं यायेगु धइगु विषयसं सहलह याःगु खः ।

भौतिक योजना मन्त्रालयया राज्य मन्त्री देबी खड्काया उपस्थितिइ जूगु उगु सहलहसं सरकारपाखें काठमाण्डौं उपत्यकाया दीर्घकालीन विकास यायेगु नितिं नेवाःत नापं सहलह यानां अवधारणा दयेका न्ह्योने वनीगु जूगु दु । नेपाः संघियताय् वनेत्यंगु ई लिक्क वयाच्वंगु व याकनं हे नेवाः राज्य घोषणा जुइत्यंगु इलय् स्थगित जुयाच्वंगु विधेयकयात हाकनं हत्थासं वइगु धइगु विवादया खा खः । स्वनिगःया गुगु कथं विकास यायेगु धइगु नितिं अधिकार नं नेवाःतय्त हे दयेमाः । अथे धयाच्वंगु इलय् हाकनं नेवाःत ब्यवस्थीत शहरी विकासया विरोधी धाःसा मखु अथे जुयानं याकनं हे नेवाः राज्य घोषणा जुइत्यंगु दु । उकिं छाय् हत्थासं वःगु दु थ्व धाःसा अजू चाःगु विषय खः ।

सरकारं स्वनिगःया विकासया नितिं स्वंगु जि.वि.स, न्यागू नगरपालिका, ९८ गू गा.वि.स. व थीथी अर्धसरकारी वा सरकारी निकायं थीथी योजना व कार्यक्रम तयाः न्ह्योने वनेगु इलय् समन्वयया अभावया कारण ब्यवस्थित शहर दयेके मफूगु कारण स्वनिगःयात छगू हे योजना इकाईया कथं विकास यायेमाःगु आवश्यक जूगु धकाः उल्लेख यानाः तःगु दु । सहलह ज्याभवलय् मन्त्रालयपाखें खा तसें नगर विकास ऐन २०४५ संशोधन यायेगु खः वा न्हूगु विधेयक दयेकेगु नेवाःतय्सं निर्णय यायेमाल धकाः इनाप याःगु खःसां नेवाःतय्सं आप्रवासन अप्वयेकाः स्वनिगःया जनसंख्या अप्वयेकेगु ज्या दिकेगु व जग्गा विकासया नामं थप समस्या हयेगु पलेसा अव्यवस्थित शहरीकरणयात व्यवस्थित यायेगु स्पष्ट प्रतिबद्धता प्वंकुसा थप सहलह यायेफइगु धाःगु दु । सहलहखय् व्वतिकाःपिं सकस्यां छप्वाः म्हुतुं न्हूगु बिधेयक हयेगु ज्या मयायेत छ्याता वियाथकूगु दु ।

सहलहखय् भौतिक व निर्माण राज्य मन्त्री देवी खड्का, मन्त्रालया सचिव, संघर्ष समितिया नायः दिलबहादुर श्रेष्ठ, सभासद् हितमान शाक्य व दिलिप महर्जन, मल्ल के सुन्दर, डा. महेशमान श्रेष्ठ, प्रेमशान्ति तुलाधर, गजेन्द्र मानन्धर लगायत आपाल नेवाःतय्गु उपस्थिति दुगु खः ।