सहमति सरकारया सम्भावना मदु : नायः प्रचण्ड

एमाले बहुमतीय सरकारया विरुद्ध

ये (झीगु स्वनिगः)

एकीकृत नेकपा माओवादीया नायः पुष्पकमल दाहाल 'प्रचण्डं' सरकार निर्माणय् दलतदथुइ सहमति जुइमफुसां नं शान्ति व संबिधान निर्माणय् सहमति जुइगु धयादीगु दु । प्रधानमन्त्रीइ सहमति दयेकेत तसकं थाकूगु धयादिसें वय्कलं शान्ति व संबिधानय् धाःसा छुं दिसं हे सहमति जुइगु धयादिल । सहमतिया नितिं फुक्कसिनं त्याग यायेमाःगुलिइ बहः बियादिसें नायः प्रचण्डं मेगु दल थुकिइ सकारात्मक जुइमफयाः समस्या जूगु धयादिल । न्हू बजारय् च्वंगु थःगु हे निबासय् सोमवाः सञ्चारकर्मीतलिसे खाल्हासें नायः प्रचण्डं थःपिंसं सहमतिया सरकारया नेतृत्वया नितिं दाबी न्ह्यःब्वयाः कांग्रेसं शेरबहादुर देउवायात न्ह्यःने न्ह्याकूगुलिं सहमतिया सम्भावना ताःपाःगु धयादिल ।

वय्कलं न्ह्याग्गु हे प्रक्रियाय् वंसां नं भावी प्रधानमन्त्री पार्टीया न्वकु डा.बाबुराम भट्टराई हे जुइगु निश्चित जूगु स्पष्ट यानादिल । अथेहे, सोमवाः पार्टी मुख्यालय बल्खुइ च्वंगु एमाले केन्द्रीय समितिया बैठकं राष्ट्रिय सहमतिया सरकारया नितिं नेपाली कांग्रेसया उम्मेदवार शेरबहादुर देउवायात समर्थन यायेगु विषयलय् सहमति जूगु दु । सोमवाःया बैठकय् शान्ति व संविधानया विषयसं माओवादीलिसे गम्भीर वार्ता यायेगु निर्णय याःगु एमालें झिंन्यान्हुनिसें निलातक्क माओवादीं पुनवर्गीकरणया स्पष्ट खाका हःसा उबलेतक्क खनाल नेतृत्वया सरकार कायम जुइगु व अनंलिपा माओवादीया नेतृत्व स्वीकार यायेफइगु सर्त न्ह्यःने न्ह्याकूगु दु ।
केन्द्रीय समिति बैठकं बहुमतीय सरकारय् सुयात समर्थन यायेगु धइगु निर्णय यायेगु अधिकार धाःसा स्थाई समितियात ब्यूगु दु ।