संविधानसभाया म्याद स्वला थपे यायेगु तयारी
छवाः न्ह्यः हे प्रस्ताव यंकीगु
येँ (सन्ध्या टाइम्स)/संविधानसभाया म्याद थप यायेगु विषयय् कानुनी विवाद पिहां वयाच्वंगु इलय् आः सरकारं अज्याःगु विवाद नं समाधान याना यंकेगु लागिं म्याद क्वचाये स्वयां छवाः न्ह्यः हे म्याद थपया प्रस्ताव संसदय् पेश याइगु जूगु दु। थ्व स्वयां न्ह्यः म्याद क्वचाइगु न्हि कुन्हु नं अन्तिम इलय् वयाः जक म्याद थपया प्रस्ताव यंकेगु याना वयाच्वंगु खः ।
संविधानसभाया म्याद थपया बारे विवाद जुयाच्वंगु इलय् समस्या समाधान यायेगु निंतिं संविधासभाया म्याद फुइगु छवाः न्ह्यः हे प्रस्ताव यंकाः प्रस्तावयात कानुनी प्रक्रिया कथं परिपक्व यानाः म्याद थप यायेगु निंतिं थज्याःगु तयारी याःगु खँ छम्ह नेतां कनादीगु दु ।
म्हिगः संविधानसभाय् दुथ्याःगु फुक्क धइथें दलया प्रतिनिधिमुलक नेतात शितल निवास वनाः राष्ट्रपति डा. रामवरण यादवयात राष्ट्रिय सहमतिया सरकार दयेकेगु निंतिं हाकनं स्वन्हुया म्याद थप यायेत इनाप याःगु खःसा राष्ट्रपतिं उकियात स्वीकृत यानादीगु दु ।
उगु इलय् राष्ट्रपति यादवं संविधानसभाया म्याद बारे सर्वोच्च अदालतं लिपांगु इलय् यानातःगु ब्याख्या ब्वनेत नं दलया नेतातय् इनाप यानादीगु खः। वहे इलय् कामचलाउ प्रधानमन्त्री नापं एमाले अध्यक्ष झलनाथ खनालं आः संविधानसभाया म्याद फुइगु छवाः न्ह्यः हे थःपिंसं प्रस्ताव यंकाः उकियात परिपक्व यायेगु कथं तयारी यानाच्वनागु जानकारी बियादीगु खः ।
सर्वोच्चय् संविधानसभाया म्यादयात कयाः मुद्दा दायर याःपिंसं छुं नं कथंया प्रस्ताव पारित यायेत छवाः न्ह्यः हे प्रस्तुत यानाः बैधानिक कथं परिपक्वता मबिसे अन्तिम इलय् वयाः जक म्याद थप याना वयाच्वन धकाः द्वपं बिउगुलिं थुपालय् दलतय्सं उकथंया योजना दयेकूगु खः।
दलतय्गु हे सहमति कथं संविधानसभाया म्याद स्वला थप यायेगु बारे माओवादी, कांग्रेस, एमाले व मधेशवादी दलत नापं मेमेगु दलया नेतातलिसे सहलह जुयाच्वंगु खँ छम्ह नेतां जानकारी बियादीगु दु ।
संविधानसभाया म्याद थप यायेगु नितिं संविधानया धारा हे संशोधन याये माःगु जुयाः दुई तिहाई बहुमत आवश्यक जुइ। उकिं थुकिया निंतिं माओवादी, कांग्रेस व एमाले छप्पँ जुइमाःगु अवस्था दयाः सहलह यानाच्वंगु खँ धाःगु दु ।
