'नेवाः राज्य मदुगु संविधान नेवाःतय्त स्वीकार्य मदु'
यल (सन्ध्या टाइम्स)/नेवाः स्वायत्त राज्य मंकाः संघर्ष समितिं म्हिगः अशोक पार्टी पालेसय् ग्वसाः ग्वःगु 'शान्ति प्रक्रिया, संविधान निर्माण व नेवाः स्वायत्त राज्य' विषयक बृहत् राजनीतिक गोष्ठीइ यदि आः जुइगु राज्य पुनर्संरचनाय् स्वनिगःयात राजधानी प्रदेश वा केन्द्र शासित प्रदेश कथं तल धाःसा नेवाःतय्सं थःपिनि संघर्ष जारी हे याना तइ धकाः ख्याच्वः बिउगु दु। ज्याझ्वलय् सहभागी स्वंगू मू मू दलया शीर्ष नेताय्सं नेवाः स्वायत्त प्रदेश प्रति ऐक्यवद्धता प्वंकूगु खः ।
गोष्ठीइ न्ववासें एकीकृत माओवादीया अध्यक्ष प्रचण्डं नेपाःया राजनीतिक गतिविधिइ स्वनिगः दुनेया नेवाःतय् महत्वपूर्ण स्थान दु धासें संकीर्ण राज्य प्रणालीया सोच स्वयां च्वय्या सोच एकीकृत माओवादीया जूगुलिं नेवाः राज्य प्रति थःपिनि सुरुंनिसें हे पूर्ण समर्थन दु धयादिल ।
नेपाली कांग्रेसया उपसभापति रामचन्द्र पौडेलं फुक्कं पक्षयात मिले यानाः राज्य विभाजन यायेगु खँय् नेपाली कांग्रेसं विशेषज्ञतय् सल्लाह कथं ज्या न्ह्याकाच्वंगु दु धासें झिंप्यंगू राज्य अप्वः जुइगु तायेकाः थःपिंसं खुगू वा न्हय्गू जक प्रदेश दयेकेगु कुतः यानाच्वनागु दु धयादिल। वय्कलं सांस्कृतिक पहिचानया आधारय् नेवाः राज्यया बारे अन्तिम निष्कर्ष पिकायेत स्वयाच्वनागु व नक्सा सहितया सहलह यानाच्वनागु खँ नं कनादिल ।
एमालेया उपाध्यक्ष वामदेव गौतमं आत्मनिर्णय सहितया नेवाः राज्य थःपिंत स्वीकार जूगु खँ न्ह्यथँसें थनया बास्तुकला, सांस्कृतिक धरोहर व जनसंख्यायात ध्यानय् तयाः थ्व थाय्या विकासया लागिं नेवाः राज्य मजिउ धकाः आः सुनानं धाये हे फइ मखुत धयादिल ।
ज्याझ्वलय् संघर्ष समिति सचिवालय संयोजक मल्ल के. सुन्दरं यदि नेवाः राज्य मवल वा स्वनिगःयात राजधानी प्रदेश वा केन्द्रीय शासित प्रदेश कथं तल धाःसा धाःसा न्हूगु संविधान वये धुंकाः नं नेवाःतय् स्वायत्त प्रदेश प्राप्तिया संघर्ष न्ह्याना हे च्वनी धयादिल। उगु ज्याझ्वलय् संघर्ष समितिया नायः दिलबहादुर श्रेष्ठं समितिया न्हूगु ज्याझ्वः घोषणा यानादीगु खः ।
