नेपालभाषाया कवि दुर्गालालयात जगदम्बा

नेपालभाषाया ज्वः मदुम्ह कवि दुर्गालाल श्रेष्ठयात थुगु दँया जगदम्बाश्री सिरपाः बीगु घोषणा मदन पुरस्कार गुठीं याःगु दु। सिरपाः घोषणां नेपालभाषा ख्यलय् छगू तःधंगु हे लसता व्याप्त जूगु दुसा उकिया नापनापं सिरपाः स्वयमं नं थःगु प्रतिष्ठायात उच्चताय् यंकूगु अनुभव जूगु दु। जगदम्बाश्री सिरपाः खास यानाः अज्याःपिं जक साहित्यकारतय्त बीगु खः गुम्हेस्यां विशुद्ध खस नेपाली भासं जक साहित्य सिर्जना याइ, चाहे व स्वदेशी जुइमा व विदेशी। गैर खस नेपालीं साहित्य च्वइम्ह खःसा नेपाली नागरिक हे जूसां थ्व सिरपाः बीगु मयाः। तर खस नेपाली भासं साहित्य च्वइम्ह जुल धाःसा दार्जिलिंग, आसामया गैर नेपालीतय्त नं थ्व सिरपाः बीगु याना वयाच्वंगु दु। दुर्गालाल हे अज्याःम्ह न्हापांम्ह नेपाली साहित्यकार जुयादीगु दु गुम्हेस्यां थःत विशुद्ध नेपालभाषाया साहित्यकार खः धकाः दावी यानाः नं थ्व सिरपाः काये खनाच्वंगु दु। खतुं दुर्गालालजुं लिपांगु इलय् वयाः खस नेपाली भासय् नं छुं कृति बियादीगु दु, तर नेपालभाषाया तुलनाय् व तःधंगु मखु। नेपालभाषाय् वय्कलं गुलि योगदान यानादिल, व नं मूलतः नेपाःया हे सम्पत्ति खः। केवल माध्यम जक फरक जुल, दुर्गालालजुं नेपाली साहित्य भण्डार जायेकेगु ज्याय् गुलि योगदान यानादिल उलि ला वर्तमान इलय् सुं खस नेपाली भाय्या साहित्यकारं खस नेपाली भाय्या माध्यमं नं याःगु मदुनि। दुर्गालालजुयात जगदम्बा सिरपाः बिउगु धइगु वय्कलं नेपालभाषा ख्यलय् यानादीगु योगदानयात राष्ट्रयात हे याःगु योगदान खः धकाः याःगु छगू स्वीकारोक्ति नं खः। जगदम्बाया थुगुसीया मू विशेषता थ्वहे धायेमाः ।

More Stories Like this