नेवाः प्रदेश कि राजधानी प्रदेश?

अन्तर्क्रिया

नेवाः राजनैतिक अभियानया ग्वसालय् "नेवाः प्रदेश कि राजधानी प्रदेश?" विषयय् छगू अन्तरक्रियात्मक गोष्ठी जुल। प्रा. माणिकलाल श्रेष्ठया सभापतित्वय् न्ह्याःगु उगु ज्याझ्वलय् ग्वसाः खलःया नायः शाक्य सुरेनं राजनैतिक प्रतिवेदन न्ह्यब्वयादीगु खः ।

ज्याझ्वलय् न्ववासें शिक्षाविद् लक्ष्मण राजवंशीं दकलय् न्हापां जातीय प्रदेश वइ कि मवइ धयागु खँय् हे नेवाःतय्सं विचाः यायेमाः धयादिल। वय्कलं राजधानी प्रदेश वल धाःसा उकी दुने नेवाःतय्गु म्हसीका सहितया अग्राधिकार दइगु खः वा मखु व संघर्ष समितिं थःगु अवधारणा ध्वाथुइके माःगु बिचाः प्वंकादिल ।

डा. महेशमान श्रेष्ठं २००७ सालंनिसें हे नेवाःतय्त विस्थापित यायेत सरकार लगे जुयाच्वंगु धासें गुथि संस्थानय् जग्गा सट्टाभर्ना यायेगु नियम, बाह्य चक्रपथ, उपत्यका सहरीकरण विधेयक थुकिया दसि खः धयादिल।
भाइराजा रञ्जितं नेवाःतय्गु ल्याः नेवाः प्रदेश दुने आः तक नं म्हो मजूनि धासें छगू जक जातिया दुने कायेबलय् गुगुं नं जाति ५० प्रतिशत स्वयां अप्वः राजधानी दुने मदुगु खँ कनादिल। वय्कलं आइएलओ-१९७ कथं नेवाःत न्ह्यज्यात धाःसा बांलाइगु बिचाः प्वंकादिल। एकाराम सिंहं थौंया इलय् अलमलय् लानाच्वंगु दु धासें नेवाः-नेवाः दुने हे द्वन्द्व जुइफुगु खँय् सतर्क जुइत नं इनाप यानादिल ।

राजेन्द्र मानन्धरं नेवाःत अप्वः व्यापारी जूगु कारणं अवसर स्वयाः थाय् हिलीगु जूगुलिं राजधानी प्रदेशपाखे विचाः यायेमाःगु खँ कनादिल। सुनिल महर्जनं नेवाःत थौंया अवस्थाय् योजनावद्ध रुपं न्ह्यानाच्वंगु मदु धासें संचार माध्यम व साधारण नेवाःतय्त कःघानाः वनेमाः धयादिल। न्हुच्छे महर्जनं राजधानी पित यंकेत जक नं अःपु मजू धासें थ्व खँय् नेवाःत हथाय्चाये म्वाःगु खँ न्ह्यथनादिल। राजधानी पिने हे यंकल धाःसां नं नेवाः प्रदेशयात सुरक्षित यानाः जक यंकेमाःगु बिचाः तयादिल। महेश्वर श्रेष्ठं राजधानी प्रदेश व नेवाः राज्य न्यागु हे जूसां नं न्हापां मेमेगु देय्या अवस्थाया अध्ययन यानाः जक बिचाः यायेमाःगु प्रस्ताव न्ह्यब्वयादिल। जातीय राज्य वल धाःसा लिपा नेवाःतय्त हे नं आत्मघात जुइगु खः ला धयागु न्ह्यसः नं वय्कलं तयादिल ।

खगेन्द्रबहादुर जोशीं अवसर धयागु अप्वः यानाः राजनैतिक रुपं वइगु जुयाः राजनीतिपाखे ध्यान बीमाःगु विचाः प्वंकादिल। डा. रमेशकुमार श्रेष्ठं बाह्य रिङ्गरोड नेवाःतय्गु निंतिं खतरा जूगु, परिवार नियोजनया चलन व ब्रेन ड्रेनया कारणं नेवाःतय्गु ल्याः म्हो जूगु खँ न्ह्यथनादिल। वय्कलं राजधानी प्रदेशया निंतिं व्यापक सहलह ब्याकेमाःगु खँ न्ह्यथँसें राजधानी प्रदेशया विषयय् बागमती, नेपाल राष्ट्र बैंक, बबरमहल, सिंहदरबार, नारायणहिति दरबार संग्रहालय, शितल निवास लगायतया लागा राजधानीया निंतिं त्वःता बिल धाःसा नेवाःतय्गु वस्ती व संस्कृति संरक्षण जुइगु विचाः नं प्वंकादिल।
दकलय् लिपा प्रा. श्रेष्ठं नेवाः स्वायत्त राज्य नं च्वने फुगु व राजधानी नं च्वने फुगु राज्य नेवाःतय्त माःगु खँ कनादिल। वय्कलं आःयात राजधानी प्रदेश घोषणा याये हथाय् मजूगु खँ नं तयादिल ।

ज्याझ्वलय् श्याम मुरी, सरिता महर्जन, सानुकाजी महर्जन, गोर्की श्रेष्ठ, प्रयागराज सिंह सुवालपिनिगु नं उपस्थिति दुगु खः ।