कांग्रेसपाखें स्वन्हु थप ई माग
येँ (सन्ध्या टाइम्स)/सहमतीय सरकार गठन यायेगु नितिं राष्ट्रपति डा. रामवरण यादवं बियादीगु छवाःया म्याद थौं फुइत्यंगु दुसा थौं हे नेपाली कांग्रेसया पदाधिकारीतय् बैठक च्वनाः सहमतीय सरकार गठनया कुतः न्ह्यानाच्वंगु कारणं मेगु स्वन्हु म्याद थप यायेत राष्ट्रपतियात इनाप यायेगु निर्णय याःगु दु। कांग्रेस सभापति सुशील कोइरालया छेँ महाराजञ्जय् च्वंगु उगु बैठकं थ्व निर्णय याःगु खः। कांग्रेसं माओवादी, एमाले व मधेसवादी मोर्चाया शीर्ष नेतात समेत दुथ्याइगु बैठकय् उगु प्रस्ताव यंकेत्यंगु दु। वयां लिपा सर्वदलीय ढंगं राष्ट्रपतियात औपचारिक इनाप याइ ।
मेखे थौं सुथंनिसें मूमू दलया शीर्ष नेतातय् दथुइ औपचारिक व अनौपचारिक कथंया सहलह जुयाच्वंगु दु। यदि व्यवस्थापिका संसदया मूमू दलपाखें सहमतीय सरकारया निंतिं म्याद थप यायेत इनाप यात धाःसा राष्ट्रपति यादवं हाकनं म्याद थप यानादीगु सम्भावना दु। न्हापा माधव नेपालं प्रम पदं राजीनामा बीधुंकाः दलतय्गु हे सहमति कथं सहमतीय सरकार दयेकेत राष्ट्रपतिं म्याद थप यानादीगु खः। यदि म्याद दुने नं सहमतिया सरकार मवःसा हानं बहुमतीय प्रणालीइ हे वनी ।
'थौं नेतातय्सं परीक्षा बियाच्वंगु दु'
प्रधानमन्त्री नापं एमालेया अध्यक्ष झलनाथ खनालं नेता व राजनीतिक दलतय्सं थौं परीक्षा बियाच्वंगु खँ न्ह्यथनादीगु दु ।
नेपाल पत्रकार महासंघया भवन शिलान्यास यानादिसें थौं येँय् प्रधानमन्त्री खनालं धयादिल, 'थौं नेता व दलतय्गु परीक्षाया दिं खः। सारा नेपाःमि जनता व अन्तर्राष्ट्रिय समुदायं झीपाखे मिखा ब्वयाः स्वयाच्वंगु दु।'
वय्कलं थौंया दिं तसकं महत्वपूर्ण जुयाच्वंगु दु धासें धयादिल, 'दल व नेतात थ्व परीक्षाय् उत्तीर्ण जुइ धकाः जिं आशा यानाच्वनागु दु। थुकिया नितिं थवंथवय् एकता व सहमतिया आवश्यकता दु ।'
प्रम खनालं राजीनामा बियादीधुंकाः एमालें हानं प्रधानमन्त्रीया दावी याये मखु धायेधुंकूगु दु ।
