दुर्गालालयात जगदम्बा सिरपाः
येँ (सन्ध्या टाइम्स)/खस नेपाली भाषाया ख्यलय् अतिकं सम्मानित सिरपाः कथं कयातःगु जगदम्बा सिरपाः थुगुसी न्हापांखुसी थःगु परम्परां पिहां वयाः नेपालभाषा साहित्यया सेवा यानादीम्ह जनकवि दुर्गालाल श्रेष्ठयात लःल्हायेगु निर्णय जूगु दु ।
निगू लाख तकाया थ्व सिरपाः कवि दुर्गालालयात 'थःगु मांभाय् नेपालभाषाया अनवरत सेवा व नेपाली भाषाया नं कविता व म्येँ ख्यलय् यानादीगु योगदान' कथं प्रदान यायेगु निर्णय जूगु खः। मातृभाषा सेवायात समेत कदर यानाः बिउगु कारणं थुगुसी जगदम्बा सिरपाःया चर्चा फरक कथं जूगु दु। कवि दुर्गालालं थ्व सिरपाःयात थम्हं मांभासाय् यानागु सेवायात मेगु समुदायं समेत याःगु कदर कथं कयागु बिचाः प्वंकादीगु दु ।
जगदम्बा सिरपाःया नापं तुं मदन पुरस्कार गुठीपाखें बीगु मेगु नांजाःगु सिरपाः मदन सिरपाः धाःसा थुगुसी धनकुटाया च्वमि मय्जु झमककुमारी सुवेदीयात बीगु निर्णय याःगु दु। झमकया 'जीवन फूल कि काँडा' सफूया निंतिं थ्व सिरपाः बिउगु खः ।
