दुर्गालालया 'भिक्षुया मतिना' पिदन

येँ (सन्ध्या टाइम्स)/जनकवि दुर्गालाल श्रेष्ठया खण्डकाव्य "भिक्षुया मतिना" म्हिगः संस्कृतिविद् सत्यमोहन जोशीं छगू ज्याझ्वःया दथुइ विमोचन यानादिल। गणेशमान सिंह अध्ययन प्रतिष्ठानया ग्वसालय् जूगु उगु ज्याझ्वलय् साहित्यकार चित्तरञ्जन नेपाली व हितकरवीरसिंह कंसकारं विमोचन जूगु सफू समीक्षा यानादीगु खः ।

जनकवि श्रेष्ठया सफू विमोचन यानादिसें संस्कृतिविद् जोशीं भाषा, साहित्य व संस्कृतिया विकास क्रमय् थुगु सफुलिं तःधंगु दिशाबोध याइगु खँ कनादिल। वय्कलं सफूया च्वमि जनकवि जक मजुसे 'झी कवि' नं खः धासें वय्कःया व्याख्या यायेत छम्ह वास्तविक सःसिउम्ह विज्ञया आवश्यकता जूगु खँ कनादिल ।

च्वमि श्रेष्ठं विमोचन जूगु खण्डकाव्य 'भिक्षुया मतिना'य् बुद्ध धर्मया मार्मिक सारलिसें अनित्यता व अनिवार्यताया विषयय् ध्वाथुइकेत कुतः यानागु दु धयादिल। ग्वसाः खलःया नायः लिसें सभासद् नविन्द्रराज जोशीया सभापतित्वय् न्ह्याःगु उगु ज्याझ्वलय् सभानायः जोशीं भाषाया दथुइ द्वन्द्व मजुइमा धयादिसें भाषा सम्बन्धी छगू कोष दयेकेत मूपाहां संस्कृतिविद् जोशीयात इनाप यानादिल। विमोचित सफुली छम्ह राजनर्तकी वासवदत्तां भिक्षु आनन्दयात याःगु प्रेमयात सरल व मार्मिक रुपं चित्रण यासें बुद्ध धर्मया सारनापं मतिनाया अर्थयात दर्शनया रुपय् अभिव्यक्त यानातःगु दु ।

तलेजु पार्टी प्यालेसय् जूगु उगु ज्याझ्वलय् लुम्बिनी विश्वविद्यालयया उपकुलपति डा. त्रिरत्न मानन्धरं लसकुस यानादीगु खः। सभासद जोशीं थःत घरभाडा कथं संसद सचिवालयं वःगु दामं उगु सफू पिथनादीगु खःसा ल्यं दुगु ध्यबा तयाः भाषा कोष स्थापना खँ अन कनादीगु खः ।