थौं नं सहमति मजूसा बहुमतीय: यादव
येँ (सन्ध्या टाइम्स)/ उपप्रधान नापं परराष्ट्रमन्त्री उपेन्द्र यादवं थौं तकया दुने नं सहमतीय सरकार दयेके मफुत धाःसा बहुमतीय प्रक्रियाय् वनी धयादीगु दु ।
थौं सुनसरीइ संचारकर्मीतलिसे खँल्हासें वय्कलं धयादिल 'थौं तकया दुने सहमति जुइ मफुत धाःसा बहुमतीय सरकार दयेकेगु लँपुइ वनी। सहमतीय सरकारया विकल्प मदुसां नं सहमति जुइ फइगु अवस्था खने मदु ।'
बहुमतीय पद्धतिपाखें दयेकीगु सरकारं हाकनं समस्या समाधान याये फइ मखु धासें मधेसी जनअधिकार फोरमया अध्यक्ष यादवं थुकिं याना: देशय् हाकनं राजनीतिक अस्थिरता ब्वलनीगु ख्याच्वः नं बियादिल।
भदौ १४ गते संविधानसभाया म्याद फुइगु न्हि तक नं आःया अवस्थाय् छुं नं कथंया प्रगति जुइ मखु धासें वय्कलं हाकनं म्याद थप यायेगुया विकल्प नं मदु धयादिल ।
