आः डा. सत्यमोहन जोशी

येँ (सन्ध्या टाइम्स)/नांजाःम्ह लोक संस्कृतिविद् सत्यमोहन जोशीयात महाविद्यावारीधि उपाधिं विभूषित याःगु दु। काठमाडौं विश्वविद्यालयपाखें थन छगू विशेष दीक्षान्त समारोहयासें प्रधानमन्त्री झलनाथ खनालया ल्हातिं भाजु जोशीयात उगु सम्मानं विभूषित याःगु खः।
थःत बिउगु सम्मानया कदरयासें संस्कृतिविद् जोशीं 'चण्डेश्वरी'या नाटक स्वयाच्वनागु इलय् थःत उगु पदं विभूषित याइगु जानकारी वःगु खँ कँसें उगु नाटक हे थःगु निंतिं बरदान जूगु खँ कनादिल। वय्कलं थौंकन्हय् शिक्षा व संस्कृति विषयया अभाव दु धासें काभ्रे जिल्लाय् छगू संस्कृति सम्बन्धी संग्रहालय दयेकेमाःगु विचाः नं प्वंकादिल ।

देय्या लोकसंस्कृतिया ख्यलय् थौंतक वय्कलं याना वयाच्वनादीगु योगदानया कदर यासें काठमाडौं विश्वविद्यालयं वय्कःयात उगु मानार्थ विद्यावारिध सम्मानं विभूषित याःगु खः। वय्कलं नेपाःया जाति, भाषा, संस्कृति, नखःचखः, रीतिथिति, लोकगीत, लोकसंस्कृति आदि ख्यलय् आपालं अन्वेषण यानादीगु दु। संस्कृति सम्बन्धी वय्कःया आपालं सफू नं पिहां वयेधुंकूगु दु।
विश्वविद्यालयं नीदँ लिपा दकलय् न्हापां थज्याःगु विशेष दीक्षान्त समारोह याःगु खः। समारोहय् शिक्षामन्त्री गंगालाल तुलाधर, डा. सुरेशराज शर्मा, उपकुलपति डा. नरेन्द्रबहादुर शर्मा, प्रा. सुवास के.सी, सभासद् पद्मज्योति कंसाकार आदिपिं नं उपस्थित जुयादीगु खः ।