सहमतिया लागिं अझ नं कुतः जुइमाः

सहमतिया सरकार गठन यायेगु लागिं राष्ट्रपति रामवरण यादवं दलतय्त बियातःगु छवाःया म्याद थौं क्वचायेत्यंगु दु। राष्ट्रपतिं बियादीगु म्याद थौं क्वचाइगु खःसां दलतय्सं अझ नं सहमतिया सरकार दयेकीगु छुं सम्भावना धाःसा पिहां वःगु मदुनि, थ्व चिन्ताया विषय खः। सहमतिया सरकार दयेकेगु ज्याय् दलत थुगुसी यक्व हे न्ह्यःने वनेधुंकूगु खनेदु। गथे कि तःधंगु स्वंगुलिं दलया शीर्ष नेतातपाखें सहमतिया सरकार हे दयेके धकाः प्वंकादीगु प्रतिवद्धता, स्वंगूगु तःधंगु दल एमालें सहमतिया सरकार दयेकेगु खःसा थःपिं बाधक मजुइगु व सुनां दयेकेफु वयात हे समर्थन यायेगु निर्णय, सरकार गठनया दावेदार कांग्रेस व माओवादी दथुइ पालंपाः सरकारया नेतृत्व यायेगु धकाः जूगु सहमति आदि। थज्याःगु ज्याखँ थ्वयां न्ह्यः जूगु मदु। थुपालय् राजनीतिक पार्टीत सहमतिया सरकार गठनया लँय् यक्व हे न्ह्यःने वनेधुंकूगु कारणं उकियात दथुइ तुं त्वःतेगु पाय्छि जुइ मखु। बरु ई मगाःगु खःसा राष्ट्रपतिपाखें ई थपे यानाः जूसां सहमतिया सरकार गठनया लागिं आः तक जुइधुंकूगु उपलब्धीया रक्षा यासें उकियात पूर्णता बीगु कुतः जुइमाः ।

यदि सहमतीय सरकार गठन याये मफुत धाःसा बहुमतीय सरकार गठनया ज्या नं अःपु मजू। खास यानाः एमाले व मधेशवादी दलतय्सं थ्व इलय् सहमतीय सरकार हे गठन यायेमाः धकाः दवाव बियाच्वंगु कारणं उमिगु समर्थन बिना सुनां नं बहुमतीय सरकार गठन याये फइगु सम्भावना मदु। यदि थज्याःगु इलय् हानं न्हापा थें हे चुनाव प्रक्रियाय् वन धाःसा तःगूमछि चरण निरर्थक चुनाव यानाः ई सितिकं छ्वयेगु ज्या जक जुयाच्वनी ।

More Stories Like this