विवाद दुने क्वचाल मिस नेपाल यूएसए

विवादया दथुइ नकतिनि हे मिस नेपाल यूएसए २०११ क्वचाःगु दु । फाइनल कासा जुइगु सनिलय् आयोजक कमिटिया अध्यक्ष नायिका गौरी मल्लं थःगु पदपाखें राजीनामा बिइवं थुगु कासाप्रति हे मनूतय्‌सं शंका प्वंकूगु खः ।

व्यवस्थापन पक्ष कम्जोर जूगु धासें नायिका गौरी मल्लं थःगु पदभार त्वःतूगु खः । उखे आयोजकतय्ंस‌ धाःसा थुकियात 'मिस कम्यूनिकेशन' या संज्ञा ब्यूगु दु । विशेष यानाः व्यापारिक दृष्टि जक थुगु कासा आयोजन याःगु व नायिका मल्ल थेन्याःपिनिगु ख्वाः ब्वयाः आयोजकतय्‌सं लबः कायेत्यंगु धकाः मनूतय्ंसं टिप्पणी यानाहःगु दु ।

मिस नेपाल यूएसए कासा थ्व स्वया न्ह्यः सन् २००१ य् नं जुइ धुंकूगु खः । गुकिइ नेपोलिना क्षेत्रीं थुगु उपाधि त्याकूगु खः । थुगु दँया मिस नेपाल अमेरिका आयोजक इप्लानेट प्रालिं थुगु कासा हे न्हापांगु मिस नेपाल अमेरिका धकाः प्रचार याःगु जक मखुसें न्हापा नं थज्याःगु कासा जुइ धुंकूगु धैगु खँय् थःगु अनभिज्ञता प्वंकल ।

नकतिनि क्वचाःगु मिस नेपाल अमेरिका २०११ ब्यूटि कन्टेस्टय् मिस नेपाल अमेरिकाया उपाधि सुजिता बस्नेतं त्याकूगु दु । उगु कासाय् तिलस्मी विष्टं फर्स्ट रनर अप व नबिना बस्नेतं सेकेन्ड रनर अपया उपाधि त्याकूगु खः ।

मेगु उपाधि त्याकादीपिं क्वय् न्ह्यथना कथंया दु -
मिस पर्सनालिटी, मिस वेष्ट वाल्क -जुबी गौचन
मिस पपुलर - बन्दना शर्मा
मिस वेष्ट स्माइल - फेरि केसी
मिस वेष्ट हेयर - त्रियुक्ता घिमिरे
मिस बेष्ट ड्रेस - रुबी अधिकारी
मिस फोटोजेनिक - उषा नगरकोटी
मिस ट्यालेन्ट- सम्झना कार्की

कासाय् ब्वति काःपिं मेपिं मय्‌जुपिन्सं थुगु कासाय् सुयात छु टाइटल बिइगु धकाः न्हापा हे घोषणा यानातःगु व कासायात निष्पक्ष ढंगं न्ह्याके मब्यूगु धकाः आयोजकया कुंखिंगु दु ।

More Stories Like this