झमकयात मदन पुरस्कार, दुर्गालालयात जगदम्बा
मदन पुरस्कार २०६७ साहित्यकार झमक कुमारी घिमिरेयात बीगु जूगु दु । मदन पुरस्कार गुथिं 'जीवन काँडा कि फूल' नांया आत्मकथात्मक कृतिया लागि झमक कुमारीयात २०६७ सालया मदन पुरस्कार बीगु क्वःछिउगु खः । उगु सिरपाःया राशी निगू लख तका दु ।
सन् १९८०इ धनकुटाया कचिडेय् बूम्ह झमककुमारी बूसांनिसें हे ल्हाः तुति मसंगु जक मखु दनेतन्यासी वनेत व न्ववाये नं मफु । वय्कलं तुतिया ग्वाहालिं यक्व हे च्वसुत च्वयादीगु खः ।
लिपांगु इलय् पिहांवःगु 'जीवन काँडा कि फूल' नांया आत्मकथात्मक कृति यक्वस्यां ययेकूगु खः । झमककुमारीया संकल्प आफ्नै, चित्ता अग्निशिखातिर, मान्छेभित्रको योद्धाहरु, सम्झनाका बाछिट्टाहरु, झमक घिमिरेका कविताहरु, अवसान पछिको आगमन लिसेंया सफूत पिहां वयेधुंकूगु दु ।
मदन शम्सेरया लुमन्तिइ रानी जगदम्बां स्थापना याःगु मदन पुरस्कार न्हापांखुसी २०१३ सालय् सत्यमोहन जोशी चित्तरंजन नेपाली व बलराम जोशीयात बिउगु खः ।
अथेहे जगदम्बा श्री पुरस्कार जनकवि दुर्गालाल श्रेष्ठयात बीगु मदन पुरस्कार गुथिं न्ह्यथंगु दु । कवि श्रेष्ठयात बीगु थुगु पुरस्कारया राशी नं निगू लख तका हे खः । जगदम्बा श्री पुरस्कार नेपाली भाषा, संस्कृति, साहित्य लिसेंया विविध लागाय् न्ह्यथनेबहःगु योगदान मनूया संस्थायात थुगु सिरपाः बीगु खः ।
Related Stories
जनकवि दुर्गालालया दुर्गालालयात सूर्योदय स्रष्टा सम्मान कवि दुर्गालाल छिन्नलता विशेष सम्मानं सम्मानित
