थः प्रम जूसा झिंनिद्वः लडाकु समायोजन यायेगु देउवाया प्रस्ताव

येँ (सन्ध्या टाइम्स)/सहमतिया सरकार दयेकेगु व उकिया नेतृत्व पालंपाः यायेगु खँय् माओवादी व कांग्रेस दथुइ सहमति ला जुल तर न्हापांगु पाः सुयात बीगु धइगु खँय् विवाद जुयाच्वंगु इलय् कांग्रेसपाखें प्रधानमन्त्रीया उम्मेदवार जुयादीम्ह पुलांम्ह प्रधानमन्त्री शेरबहादुर देउवां माओवादीयात छगू अजूचायापुगु प्रस्ताव छ्वया हःगु दु - यदि थःत प्रधानमन्त्री दयेकल धाःसा माओवादीया १२,००० लडाकुयात सेनाय् समायोजन याना बी ।

सूत्रं बिउगु जानकारी कथं छुं न्हि न्ह्यः जक भाजु देउवां माओवादीया छम्ह पोलिटब्युरो दुजःयात फोन यानाः थ्व प्रस्ताव तयादीगु जुयाच्वन। माओवादीया सेनालिसे नं स्वापू दुम्ह उम्ह पोलिटब्युरो दुजःयात फोन यानाः देउवां धाःगु जुयाच्वन, 'छु बाबुराम, बाबुराम धकाः हालाच्वनागु छिकपिं? जितः समर्थन यानादिसँ जिं छिकपिनिगु बार्‍ह हजार लडाकुयात समायोजन याना बी ।'

पालंपाः प्रधानमन्त्री जुल धाःसा न्हापां पाः काइम्ह प्रधानमन्त्रीं सेना समायोजनया ज्या क्वचायकेगु खँ दु। उकिं देउवां सेना समायोजनया ज्या थम्हं याना बी धकाः प्रस्ताव तयादीगु खः ।

माओवादीया १९,००० लडाकु मध्ये न्याद्वः खुद्वःयात जक समायोजन याये फइ धकाः मेगु पार्टीतय्सं धयाच्वंगु दुसां माओवादीं म्होतिं नं च्याद्वःयात समायोजन यायेमाः धकाः प्रस्ताव तयाच्वंगु दु। तर देउवां झिंनिद्वःयात समायोजन याना बी धाःगुलिं माओवादी समेत अजूचाःगु खः। प्रधानमन्त्री जक जुइ दइगु खःसा न्ह्यागु नं याना बी धकाः बचं बीगु देउवाया बानी सिउपिं माओवादी नेतातय्सं वय्कःया थ्व प्रस्तावयात गम्भीर कथं धाःसा मकाःगु खँ नं सूत्रं धाःगु दु ।

देउवां थज्याःगु प्रस्ताव तःसां सेना समायोजन बारे कांग्रेसया धाःसा मेगु हे धापू दु। कांग्रेस नेतातय्सं अन्तर्राष्ट्रिय नियम कथं 'छपु बन्दुक छम्ह सेना' धइगु प्रावधान दु तर माओवादीयाके धाःसा बन्दुक ३,००० दु, सेना जक १९,००० गय् यानाः जुइ धकाः न्ह्यसः तयेगु यानाच्वंगु दु ।