स्थायी समिति बैठक दिकाः शीर्ष नेतात धनुषाय्
येँ (सन्ध्या टाइम्स)/एकीकृत माओवादीया थन जारी जुयाच्वंगु स्थायी समितिया बैठक स्थगित यानाः शीर्ष नेतात धनुषापाखे वनीगु जूगु दु। थौं स्वंगू दलया शीर्ष नेतातलिसे सहलह ब्याकेमाःगुलिं धकाः नेतातय्सं स्थायी समितिया दुजःतय्त खबर यानाः अथे बैठक स्थगित याःगु खः ।
थौं सुथय् ८ बजे पार्टीया केन्द्रीय ज्याकू कोटेश्वरया पेरिस डाँडाय् अप्वः यानाः स्थायी समितिया सदस्यत थ्यंकः वने धुंकूगु अवस्थाय् बैठक स्थगित यानागु सुचं बिउगु खः।
स्वंगू दलया बैठक क्वचाये धुंकाः हाकनं धनुषाय् वनेमाःगु जुयाः हे नेतातय्सं स्थायी समितिया बैठक स्थगित याःगु खः ।
सहिद रामबृक्ष यादवया १७ क्वःगु पुण्यतिथिया झ्वलय् धनुषाया बरमझियाय् जुइगु श्रद्धाञ्जली सभाय् सहभागी जुइत माओवादीया अध्यक्ष प्रचण्ड, न्वकुपिं मोहन बैद्य व डा. बाबुराम भट्टराई उखेपाखे वनीगु जूगु दु। हेलिकप्टरय् च्वनाः स्वम्हं नेतात धनुषाय् वनेत्यंगु खः। उगु ज्याझ्वलय् ब्वति कायेत माओवादीया मेमेपिं नेतात नं अन वनी धाःगु दु ।
