शोभराजयात हानं छगू हत्याया द्वपं
येँ (सन्ध्या टाइम्स)/नेपाःया केन्द्रीय कारागारय् कुनातःम्ह अन्तर्राष्ट्रिय अपराधी चार्ल्स शोभराजयात नेपालय् हे हानं मेम्ह छम्ह नं मिसायात स्याःगु द्वपं बीगु सम्भावना अप्वया वःगु दु। उकिया बारे नेपाल प्रहरीं अनुसन्धान यानाच्वंगु खँ सीदुगु दु ।
सन् १९७५ या डिसेम्बरय् येँय् छम्ह अमेरिकी पर्यटक मय्जु कोन्नी जो ब्रोन्भझकजयात स्याःगु द्वपनय् ज्वनाः कुनातःगु खः। वहे दँय् ख्वपय् हानं मेम्ह छम्ह मिसाम्ह पर्यटकया लाश नं लूगु खः। उम्ह पर्यटक धाःसा क्यानाडाया मय्जु क्यारेरी खः। क्यारेरीयात सुनां स्याःगु धइगु सी मदुनिसां नेपाल प्रहरीं धाःसा वयात स्याःम्ह नं शोभराज हे खः धइगु दसि लुइकूगु दु। शोभराजं मलेशिया वा थाइल्याण्डया प्रहरीयात बिउगु छगू बयानय् क्यारेरीयात नं थम्हं हे स्यानागु खः धकाः स्वीकार यानातःगु दु। यदि थ्व पुष्टि जुल धाःसा चार्ल्सयात थप मुद्दा चले जुइगु खँ धाःगु दु ।
