येँया दुने लागायात बाल श्रम मुक्त याइगु
येँ (सन्ध्या टाइम्स)/येँदेय्या दुने लागाय् थाःगु थीथी वडाय् जिल्ला स्तरीय बाल संरक्षण गोष्ठी जुल। येँया दुने लागाय् लाःगु वडाया पुलांपिं वडाध्यक्ष, वडा सचिव, जिविस, जिल्ला बाल कल्याण समिति, थीथी स्कूलया शिक्षकपिनि सहभागिता दुगु उगु गोष्ठीइ येँदेय्या भित्री लागायात बालश्रम मुक्त क्षेत्र घोषणा यायेगु विषयय् सहलह जूगु खः ।
कन्सर्न नेपालया ग्वसालय् कन्सर्नया कार्यकारी निर्देशक डा. विजय सैंजुया सभापतित्वय् जूगु उगु ज्याझ्वलय् स्थानीय विकास अधिकारी उद्धव प्रसाद तिमिल्सिना मूपाहां कथं झाःगु खः। ज्याझ्वलय् कन्सर्नया कार्य व्यवस्थापक जियम श्रेष्ठ, डीपीआर संयोजक रश्मिला प्रजापति, बाल विकास अधिकारी शारदा बस्यालपिंसं येँ जिल्लान्यंकं च्वंपिं मस्तय् स्थिति व उमिगु अवस्था सुधार यायेगु लागिं यायेमाःगु ज्याखँया बारे चर्चा यानादीगु खः ।
ज्याझ्वलय् पुलांपिं वडाध्यक्षपिं श्याम चित्रकार, विजयकृष्ण श्रेष्ठ, इश्वरमान डंगोलपिंसं नं थःपिनि नुगःखँ प्वंकादीगु खः। गोष्ठीं बाल संरक्षण बारे आधारभूत प्रक्रिया निर्माण, थीथी निकायतय् दथुइ समन्वय व सहयोग विस्तार लिसें श्रोत परिचालन बारे कार्य तर्जुमाया खाका तयार याःगु खः ।
