अनुसन्धान प्रविधि कार्यशाला गोष्ठी
येँ (सन्ध्या टाइम्स)/नेपालभाषा केन्द्रीय विभाग स्वीप्यदँ क्यंगु लसताय् थनिंनिसें अनुसन्धान प्रविधि कार्यशाला गोष्ठी न्ह्याःगु दु। विभाग प्रमुख प्रा. प्रेमशान्ति तुलाधरया सभाध्यक्षताय् जूगु कार्यशाला गोष्ठीया उलेज्या मूपाहां विश्वविद्यालय अनुदान आयोग (युजिसि)या प्रमुख प्रा. डा. गणेशमान गुरुङं यानादीगु खः ।
गोष्ठी उलेज्या यासें डा. गुरुङं थीथी थासय् गुरुङ भाय् थौंकन्हय् न्हनावं थें नेपालभाषा नं न्हनावनी धकाः थः तसकं चिन्तित जूगु खँ धयादिल। नेपालभाषा विषय समितिया दुजः शिक्षाविद् लक्ष्मण राजवंशीं नेपालय् अनुसन्धानया ज्या म्हो जक जुयाच्वंगु खँ न्ह्यथनादिसें यदि सुनानं बाखंया विषयस विद्यावारिधी याःसा झिंन्याद्वः तका दां बीगु बचं बियादिल ।
गोष्ठि उलेज्या लिपा अनुसन्धान विषयस पुलांम्ह उपकुलपति प्रा. डा. केदारभक्त माथेमा व अनुसन्धान ढाँचा सम्बन्धि लुम्बिनी विश्व विद्यालयया उपकुलपति प्रा. डा. त्रिरत्न मानन्धरं प्रशिक्षण बियादीगु खः।
प्यन्हुतक न्ह्याइगु कार्यशाला गोष्ठीइ डा. सुमनकमल तुलाधर, डा. दानराज रेग्मी, नृतत्वशास्त्री विहारीकृष्ण श्रेष्ठ, प्रा. डा. अजय विक्रम स्थापित, प्रा.डा. दयाराम सम्भव व प्रा.डा. हरिन्द्र थपलियां प्रशिक्षण बीगु ज्याझ्वः दु ।
