व्यवसायीतय् माग पूवंकेत यातायात बन्द

यातायात व्यवसायीतय्सं याःगु यातायात बन्दं यानाः म्हिगः सर्वसाधारण जनतां दुःख सी माल। व्यवसायीतय्सं न्ह्यब्वःगु मागयात सरकारं वास्ता मयाः धासें उगु बन्द आह्वान जूगु खः। खतुं बन्दया झ्वलय् तुं वार्ता नं जूगु दु। तर थ्व ज्या धाःसा अःखः कथं जूवंगु खने दत। न्हापां वार्ता यानाः अन खँ मिले मजूसा जक बन्द यायेमाःगु खः। तर न्हापां बन्द यानाः अले जक वार्ता जू वन। सर्वसाधारण जनताया मर्कायात ध्यान मतयेगु निजी क्षेत्रया स्वभाव व बन्द थेंज्याःगु कडा ज्याझ्वः मबीकं दवाव हे महसुस मयाइगु सरकारया चरित्रं यानाः देशय् तःक्वः तःक्वः हे थज्याःगु घटनात जुयाच्वंगु दु। थ्व नेपाःया दुर्भाग्य खः। देशय् निजी क्षेत्रयात च्वन्ह्याकेमाः धकाः थीथी कथंया कुतः जुयाच्वंगु दु। तर निजी क्षेत्रं थःगु हे जक स्वार्थ स्वयेगु बाहेक जनताया पक्षयात ध्यान मबीगु कारणं अत्यधिक निजीकरणं अःखः कथंया लिच्वः लानाच्वंगु खँयात नं थन ल्वःमंके मछिं। उकिसनं यातायात थेंज्याःगु अति आवश्यक ख्यःया व्यवसायीत गैरजिम्मेवार जुइगु ला झन् हे पाय्छि मजू। मेमेगु निकायतय्सं बन्द याइबलय् तकं विरोध याइपिं यातायात व्यवसायीतय्सं थःपिंसं हे बन्द याना बिउगुलिं कन्हय् बन्द ज्याझ्वः याइपिंत प्रोत्साहन जक बीगु ज्या जुइ। उकिं व्यवसायीतय्सं दकलय् न्हापां बन्दयात थाति तयाः वार्तायात निं प्राथमिकता बीमाःसा सरकारं नं वार्तापाखें समस्या ज्यंके फइ व अज्याःगु वार्तां व्यवसायीत नं सन्तुष्ट जुइ धइगु आत्मविश्वास थःके ब्वलंके माःगु खनेदु। जनताया सुविधायात केन्द्रय् तयाः स्वल धाःसा थथे याये मफइगु नं मखु ।

More Stories Like this