टेलिभिजनय् नेवाः संकिपा

नरेन्द्रमान श्रेष्ठ 'गोंगजु'

फिल्म सम्बन्धी थीथी गतिविधि व फिल्म प्रसारण याना वयाच्वंगु मनोरञ्जन, टि.भी. च्यानल 'टिभी फिल्म' च्यानलपाखें वंगु असार महिनाजःछि नेवाः फिल्म फेष्टिभलया रुपय् थीथी नेवाः भाय्या संकिपा प्रसारण यात। लछियंकं नेवाःतय्गु मनय् थाय् कायेत ताःलाःगु टि.भी. 'फिल्मी च्यानल' भविष्यय् नं थथे थीथी नेवाः फिल्म, नेवाः म्यूजिक भिडियो फेष्टिभलया नामय् थीथी नेवाः संकिपा सम्बन्धी ज्याझ्वः प्रसारण याइ धकाः आशा याये। टेलिभिजन च्यानल धयागु विद्युतीय सञ्चारया सशक्त माध्यम खः। टेलिभिजनय् सूचना, समाचारया नापनापं थीथी मनोरञ्जनात्मक ज्याझ्वः नं प्रसारण याइ। अझ धायेमाल धाःसा टेलिभिजन च्यानल थौंकन्हय् मनोरञ्जनया साधनकथं हिला वनाच्वंगु दु धाःसां जिउ। टेलिभिजनपाखें विश्वया गुगुं नं थासय् जुयाच्वंगु घटनात प्रत्यक्ष वा अप्रत्यक्ष रुपं छेँय् च्वनाः याउँक हे स्वये खनी। थीथी मनोरञ्जनपूर्ण ज्याझ्वःत न्यनेगु लिसें स्वये नं दइगु जूगुलिं थौंकन्हय् टेलिभिजन च्यानल लोकंह्वानाच्वंगु दु ।

थौंकन्हय् नेपालय् थीथी टेलिभिजन च्यानल नेपाल टेलिभिजन, एनटिभी प्लस, एभिन्यूज टिभी, इमेज च्यानल, कान्तिपुर टिभी, न्यूज २४, तराई टेलिभिजन, माउन्टेन टिभी आदि फिल्मी च्यानल प्रसारण जुयाच्वंगु दु। नेपाली टेलिभिजन मध्ये नेपाल टेलिभिजन दकलय् न्हापां प्रसारण जूगु खःसा उकी प्रसारण जूगु न्हापांगु नेवाः टेलि प्याखं "१२ बजे" खः। विगतय् इलय् ब्यलय् थीथी नेवाः भाय्या प्याखं प्रसारण याना वयाच्वंगु सरकारी स्तरया टि.भी. नेपाल टेलिभिजनं थौंकन्हय् धाःसा नेवाः भाय्या टेलिप्याखंत प्रसारण यानाच्वंगु मदु। नेपाल टेलिभिजनं समावेशी ज्याझ्वः आइतवाः पतिकं प्रसारण यानाच्वंगु नेवाः भाय्या ज्याझ्वः 'नेवाः सः' य् नं राजनीति यानाच्वंगु दु। समावेशी ज्याझ्वः कथं थीथी आदिवासीतय्गु भासं प्रसारण यानाच्वंगु ज्याझ्वः गबलें बन्द यायेगु गबलें प्रसारण यायेगु ज्या यानाच्वंगु दु। नेपाल टेलिभिजनं भाषाय् हे नं राजनीति यानाच्वंगु दु ।

नेपालभाषां सुथय्, बहनी न्हिंन्हिं बुखँ प्रसारण याना वयाच्वंगु खःसा थीथी नेवाः भाय्या टेलिसिरियल व टेलि ड्रामात प्रसारण याना वयाच्वंगु इमेज च्यानल छगू धाःसा निजी ख्यःया टिभी च्यानल खः। नेपाःया टेलिभिजन च्यानल मध्ये नेवाः भाय्या बुखँ व नेवाः भाय्या थीथी टेलिसिरियल प्रसारण यायेगुली इमेज च्यानल न्ह्यःने लानाच्वंगु दु। इमेज च्यानलं आइतवाः पतिकं टेलिसिरियल 'ख्वताबजि' टेलिड्रामा नापनापं थीथी नेवाः गतिविधि सम्बन्धी ज्याझ्वः प्रसारण याना वयाच्वंगु दु। 'समय्बजि' थेंज्याःगु थीथी सवाः दुगु ज्याझ्वः थौंकन्हय् स्वकुमितय् दथुइ तसकं लोकं ह्वानाच्वंगु दु। सरकारी स्वामित्वया टिभी च्यानल नेपाल टेलिभिजनया निगूगु च्यानल कथं प्रसारण जुयाच्वंगु टि.भी. 'एन.टि.भी. प्लसं' थौंकन्हय् नेवाः भाय्या टेलिसिरियल प्रसारण जुयाच्वंगु दु। एन.टि.भी. प्लसं शुक्रवाः पतिकं नेवाः टेलिसिरियल 'उलिंचिया बाखं थुलिंचा' व मंगलवाः पतिकं ;स्वयेगु मखु ला?' प्रसारण जुयाच्वंगु दु ।

थौंकन्हय् थीथी नेपाली न्यूज च्यानलत प्रसारण जुयाच्वंगु दु। थौंकन्हय् प्रसारण जुयाच्वंगु गुलिखे न्यूज च्यानलतय्सं नेपालभाषां समाचार अले थीथी नेवाः गतिविधियात कःघानाः नेपालभाषा ज्याझ्वः प्रसारण यानाच्वंगु दु। न्यूज च्यानल कथं प्रसारण जुयाच्वंगु 'सगरमाथा टेलिभिजनं नेपालभाषां समाचार प्रसारण नापं बिहीवाः पतिकं थीथी नेवाः गतिविधि व विषययात कःघानाः नेवाः ज्याझ्वः 'झीगु म्हसीका' प्रसारण यानाच्वंगु दु। अथे हे 'नेपाल वानं' शनिवाःपतिकं नेपालभाषाया 'लाय्लामा' प्रसारण यानाच्वंगु दु। स्पेस टाइम नेटवर्कपाखें प्रसारण जुयाच्वंगु टि.भी. च्यानल 'च्यानल नेपालं' नं इलय् ब्यलय् नेवाः भाय्या ज्याझ्वः प्रसारण यानाच्वंगु दु। तर च्यानल नेपालं प्रसारण जुइगु नेवाः ज्याझ्वलं धाःसा निरन्तरता काये मफु। न्हापा नं च्यानल नेपालं नेपालभाषाया ज्याझ्वः 'थ्यन मखुला ला?' प्रसारण याःगु खःसा उगु ज्याझ्वलं नं निरन्तरता काये मफयेवं इलय् ब्यलय् नेपालभाषां आइतवाः पतिकं 'झीगु सः' ज्याझ्वः न्ह्याकूगु खः ।

लोकंह्वाःगु सञ्चार माध्यम टेलिभिजन धयागु नेपाःया जक मखु विदेशय् च्वंपिंसं नं स्वइगु खः। बहुजाति, बहुभाषिक बसोबास दुगु देय् नेपाः खः। अले नेपाःया टेलिभिजन धयागु नेपाःया फुक्क जाति, भाषाभाषीतय्सं स्वयेगु याइ। सरकारी स्वामित्वया टिभी च्यानल जुइमा वा निजी टेलिभिजन च्यानलं छगू जक भाषाया नीति ज्वनाः न्ह्याः वनेगु पाय्छि जुइ मखु। देय संघीयताय् वनेधुंकल अले देय्या थीथी ख्यलय् समावेशीया आधारय् ज्याखँ जुइमाःगु सः पिहां वयाच्वंगुलिं नेपाःया थीथी सञ्चार माध्यमत टि.भी. च्यानल जक मखुसें मेमेगु नं सञ्चार माध्यमतय्सं थुकी ध्यान बीमाः। नेपालय् प्रसारण जुयाच्वंगु थीथी टेलिभिजनतय्सं (न्यूज वा मनोरञ्जन) थीथी आदिवासीतय्गु मातृभाषां नं बुखँलिसें ज्याझ्वः व संकिपा प्रसारण यायेमाः। कान्तिपुर नगरी कान्तिपुरया नामं प्रसारण जुयाच्वंगु टि.भी. च्यानलं येँया आदिवासी नेवाःतय्गु भासं छुं नं कथंया ज्याझ्वः प्रसारण यानाच्वंगु मदु। नेवाःतयगु भाय् नेवाः भासं जक मखुसें थीथी आदिवासीतय्गु मातृभाषां नं छुं कथंया ज्याझ्वः प्रसारण यानाच्वंगु मदु। अथे हे येँया छम्ह नेवाः अध्यक्ष जुयाच्वंगु टि.भी. च्यानल 'एभिन्यूज टेलिभिजन' य् नं नेवाः भासं वा आदिवासी भासं ज्याझ्वः प्रसारण मयासे साम्प्रदायिकता क्यनाच्वंगु दु। नेपाःया गुगुं नं सञ्चार माध्यम साम्प्रदायिकतां ग्रस्त जुइ मजिउ ।

More Stories Like this