थौं देय्न्यंकं हे यातायात ठप्प

कन्हसंनिसें निजी गाडी नं बन्द यायेगु ख्याच्वः

येँ (सन्ध्या टाइम्स)/यातायात व्यवसायीतय्सं थनिंनिसें अनिश्चितकाल तकया निंतिं धकाः सार्वजनिक यातायात बन्द याःगुलिं थौं स्वनिगः लगायत देय्न्यंकंया हे जनजीवनय् प्रभावित जूवंगु दु। सार्वजनिक यातायात बन्द आह्वान याःगुलिं सर्वसाधारणयात समस्या जूगु दु। सतकय् ह्याउँगु नम्बर प्लेटया सवारी साधन व मोटरसाइकल धाःसा चले जुयाच्वंगु दु ।

नेपाल यातायात व्यवसायी राष्ट्रिय महासंघ नापं यातायात ब्यवसायीतय्गु प्यंगू संगठनं न्ह्यब्वःगु ४१ सूत्रीय माग पूरा याकेत दवाव बी कथं थौं यातायात बन्द याःगु खः। व्यवसायीतय्सं आर्थिक वर्ष २०६८/०६९ या बजेटय् मजदूरतय् सहकारीयात गाडी न्यायेत राजश्व छुट बीगु धकाः याःगु व्यवस्थाया विरोध यासें थ्व बन्द आह्वान याःगु खः ।

थुकिया लिसें व्यवसायीतय्सं सतकयात हडताल व बन्दं मथीगु शान्तिक्षेत्र घोषणा यायेमाःगु, यातायात व्यवसायीतय्त उद्योग सरहया मान्यता बीमाःगु, यातायात मन्त्रालय बिस्कं हे गठन यायेमाःगु लगायतया माग नं सरकार समक्ष न्ह्यब्वःगु दु। सार्वजनिक यातायात बन्द आह्वान याःगुलिं येँनं तापाक्क वनीगु अले येँय् वइगु ताःहाकःगु रुटय् चले जुइगु छुं हे सवारी साधन थौं चले जुयाच्वंगु मदु ।

थ्वहे दथुइ सरकारं थौं सनिलय् आन्दोलनय् कुहां वयाच्वंपिं यातायात व्यवसायीतय्त वार्ताय् वयेत सःतूगु दु। वार्ताय् यातायात ब्यवसायीतय्सं ब्वति काः वंगु दु। छुं जुयाः वार्ताया माध्यमं समस्या समाधान मजुल धाःसा कन्हसंनिसें भाडाया सवारी साधन जक मखु निजी सवारी साधन तकं चले याके बीगु जुइमखु धकाः नं उमिसं ख्याच्वः बिउगु दु ।

थ्वहे दथुइ थौं सरकार व यातायात व्यवसायी दथुइ वार्ता जुयाच्वंगु दुसां थौं यातायात बन्द याःगु खँय् आपत्ति प्वंकुसें सरकारं यातायात सुचारु यायेत इनाप याःगु दु। वंगु मंगलवाः जक यातायात व्यवसायी व सरकार दथुइ वार्ता जूगु खःसा उगु वार्तां छुं निष्कर्ष पिहां मवःगुलिं थौं हाकनं वार्ता याःगु खः ।