नेपाः वयाच्वंगु चीनया कुटनीतिक पुचः

नेपालय् सरकार परिवर्तन जुयाः न्हूम्ह प्रधानमन्त्री ल्ययेगु तयारी जुयाच्वंगु व न्हू वःम्ह प्रधानमन्त्रीं न्हूगु हे संविधान बियाः देय्यात स्थायी शान्ति बीमाःगु थ्व इलय् लाक्क जःलाखःला देय् चीनया छगू उच्चस्तरीय कुटनीतिक पुचः नेपाः भ्रमणय् वयाच्वंगु दुसा उगु भ्रमणयात नेपाः दुने जक मखु नेपालं पिने समेत थीथी कथंया अनुमान अडकल यायेगु ज्या न्ह्यानाच्वंगु दु। चिनियाँ पुचःया थ्व नेपाः भ्रमणयात गुलिस्यां नेपाःया आन्तरिक मामिलाय् ल्हाः तयेगु कुतः कथं समेत स्वयाहःगु नं खने दया वःगु दु। खास यानाः लिपांगु इलय् वयाः चीनं नेपाः दुने थःगु उपस्थिति खने दयेक हे क्यना हयेगु सुरु याना हःगुलिं चीनया हरेक गतिविधियात उकथं विश्लेषण यायेगु ज्या जुया वःगु खः। आः तक चीनं नेपाः दुने भारतं थें छ्यातां च्वंक ल्हाः तयेगु ज्या मयाःसां भारत व अमेरिकां नेपालय् अप्वयेका हःगु भूमिकाया कारणं चीन सुम्क च्वने मफइगु अवस्था धाःसा अवश्य नं हया बिउगु खः। उकिं नेपालय् भारत व अमेरिकाया प्रभाव गुलि तच्वः जुइधुंकल व उकिं थःगु देशयात छु गज्याःगु तक लिच्वः लाकेफु धकाः नतुनेगु लागिं नं इलय् ब्यलय् नेपाःया भुतुली थःगु न्हाय् घुसे यायेगु ज्या याना हयाच्वंगु दु। आः जुयाच्वंगु चिनियाँ प्रमण्डलया भ्रमण नं उकिया हे छगू अंग खः। धुवांधू जुयाच्वंगु सरकार परिवर्तन, न्ह्यःने न्ह्याः वने मफयाच्वंगु संविधान निर्माण व शान्ति प्रक्रिया आदि थेंज्याःगु घटना नेपालय् छाय् जुयाच्वन? सुयात लबः सुनां कयाच्वन? थ्व खँय् चीनं सरोकार क्यनीगु स्वाभाविक खः। तर भारत जुइमा वा चीन, उमिगु अतिरिक्त सरोकारपाखें झी धाःसा सतर्क जुइ हे माः ।

More Stories Like this