स्वंगू दलया ज्याकुथी जनजातिया धर्ना
येँ (सन्ध्या टाइम्स)/नेपाल आदिवासी जनजाति महासंघं थौं स्वंगू तःधंगु दलया ज्याकुथी धर्ना बिउगु दु। जाति, भाषा, ऐतिहासिकता व पहिचानया आधारय् राज्यया पुनर्संरचना जुइमाःगु, राज्य पुनर्संरचना आयोगयात स्वीकार मयायेगु, राज्य पुनर्संरचना मदुगु संविधान पित हल धाःसा स्वीकार मयायेगु, सहमतीय सरकार दयेकेमाःगु लगायतया माग तसें थौं उगु धर्ना च्वंगु खः ।
आः तक निरन्तर रुपं बहुमतीय सरकार जक दयेकाच्वंगु कारणं इलय् हे संविधान मवःगु नापं सरकार दयेकेगु कासाय् जक लगे जुयाः दलया नेतातय्सं संविधान दयेकेगु ज्यायात बेवास्ता यानाच्वंगुलिं संविधानसभाया मूमू दलयात दबाव बीगु नं उगु धर्ना च्वनागु खँ महासंघं धाःगु दु। महासंघया महासचिव आङकाजी शेर्पां 'सन्ध्या टाइम्स'लिसे खँल्हासें थौं १ निसें २ बजे तक सानेपाय् कांग्रेस ज्याकुथी, २ निसें ३ बजे तक बल्खुइ एमाले ज्याकुथी व ३ निसें ४ बजेतक पेरिसडाँडाया माओवादी ज्याकुथी धर्ना च्वनेगु जानकारी बियादिल ।
खम्बुवान बन्द
भदौ १४ गते हे न्हूगु संविधान जारी यायेमाः धइगु माग यासें खम्बुवान राष्ट्रिय मोर्चां थौं अरुण पूर्वया गुंगू जिल्ला बन्द आह्वान याःगुलिं अनया जनजीवन प्रभावित जूगु दु। बन्द आह्वान यानातःगुलिं यातायात, कल कारखाना, शिक्षण संस्था व बजाः ठप्प जूगु दु ।
