२८ वडाया त्वाःछेँय् मनपाया मिखा?

येँ (सन्ध्या टाइम्स)/येँ मनपा वडा नं. २८ स्थित थाय्मरु त्वालय् च्वंगु त्वाःछेँ (नेपालभाषा मंकाः खलःया ज्याकू दुगु) या हकदार सु धइगु खँय् विवाद पिहां वःगु दु। स्थानीय मनूतय्सं हे त्वालय् च्वंपिनिगु श्रोत साधन व जनश्रमदानं दयेकातःगु उगु त्वाःछेँ आः मनपायात हस्तान्तरण यायेगु कुतः यानाहःगुलिं थ्व विवाद पिहां वःगु खः। थ्वहे झ्वलय् म्हिगः त्वालय् च्वंपिं स्थानीय बुद्धिजीवी व वरिष्ठ मनूतय् दथुइ च्वंगु छगू मुँज्यां त्वाःछेँ दयेकूसांनिसें हे थुकिया भोगचलन व संरक्षण त्वाःबहाःयापिंसं हे याना वयाच्वंगु व कानूनतः भोगचलनया लिधंसाय् उगु त्वाःछेँ सुयातं हस्तान्तरण याये फइ मखु धकाः निर्णय याःगु दु। त्वाःया निवासी भाजु मल्ल के. सुन्दरया अध्यक्षताय् च्वंगु उगु मुँज्यां आः उगु त्वाःछेँया थासय् १ करोड तकाया लागतय् सामुदायिक भवन दयेकेगु व भवनय् वडाया ज्याकू, स्वास्थ्य चौकी, सामुदायिक हल व स्थानीय सहिद शुक्र क्लबया ज्याकू च्वनेगु कथं मनपालिसे सहलह याःवनेगु निर्णय नं याःगु दु। २०३५ सालंनिसें उगु त्वाःछेँय् वडाया ज्याकू निःशुल्क तयेके बियातःगु खः ।