थुगुसी भारत मखु चीन सक्रिय

नेपाः वयाच्वंगु चिनियाँ पुचः प्रति भारत सशंकित

येँ (सन्ध्या टाइम्स)/नेपालय् राजनीतिक संकट अप्वया वइगु इलय् मेमेबलय् जूसा भारतीय नेता व कुटनीतिज्ञत नेपाः वयाः सक्रिय जुइगु खः। थुगुसी धाःसा थुकिया अःखः चीनया कुटनीतिज्ञत सक्रिय जुयाच्वंगु दु। देश भारतीय राजदूत तकं मदुगु व प्रधानमन्त्री झलनाथ खनालं राजीनामा बिउगु थ्व संकटया इलय् लाक्क चीनया छगू उच्चस्तरीय पुचः नेपालय् सक्रिय जूगु दु ।

चिनियाँ कम्युनिष्ट पार्टीया पोलिटब्युरो दुजः झाउ योंगकांगया नेतृत्वय् म्हिगः तिनि उगु पुचः नेपाः थ्यंकः वःगु खः। चीन बारे सिउपिं विज्ञतय्सं धाः कथं चीनं थःगु सरकारया मन्त्री छ्वया हइगु सिबें नं पार्टीया पोलिटब्युरो दुजःयात छ्वया हल अज्याःगु प्रतिनिधि मण्डलया महत्व अप्वः दयाच्वनी छाय्धाःसां चीनय् सरकारया नीति नियमत दयेकेगु ज्याय् सरकारी मन्त्री स्वयां नं पार्टीया पोलिटब्युरो दुजःतय् अप्वः ल्हाः दइ। नेपालय् चीनया थज्याःगु शक्तिशाली व उच्चस्तरीय पार्टी प्रतिनिधिया पुचः वःगु थुगु दँया थ्व निक्वःगु खः ।

थ्व पुचःया नेपाः भ्रमणया उद्देश्य आर्थिक व प्राविधिक ग्वाहालि बारे खँ ल्हायेत खः धयातःगु दु। तर विज्ञ सूत्रं धाः कथं थौंकन्हय् नेपाःलिसे खँ ल्हायेगु लागिं चीनयाके आर्थिक स्वयां नं राजनीतिक एजेण्डात आपाः दु। गथे कि आः नकतिनि हे वाम गठबन्धनपाखें निर्माण जूगु झलनाथ खनालया सरकार क्वःदःगु, न्हूगु सरकार सुनां व गथे यानाः दयेकी धकाः चर्चा जुयाच्वंगु, संविधान सभाया म्याद मेगु बाःछि लिपा हे फुइत्यंगु, नेपालय् तिब्बती गतिविधि न्हू ढंगं न्ह्याइगु धकाः चर्चा जुयाच्वंगु, लुम्बिनीइ चीनया नेतृत्वय् तःधंगु हे योजना सुरु जुइत्यंगु आदि आदि एजेण्डा चिनियाँ रुचीया विषयत खः ।

नेपाः वयाच्वंगु थ्व चिनियाँ पुचःयात मेगु जःलाखःला देय् भारतं नं सतिक हे च्वनाः 'निगरानी' तयाच्वंगु खँ सूत्रं धाःगु दु। चीनया उगु प्रतिनिधि मण्डलं नेपाःया आन्तरिक मामिलाय् गुगुं नं विदेशी राष्ट्रं हस्तक्षेप मयायेमाल धकाः याःगु आग्रहयात नं भारतं थःगु हे देशप्रति लक्षित यानाः धाःगु खः धकाः थुइका हःगु दु। नेपालय् भारतीय प्रभाव म्हो यायेगु ताः तयाः हे चीनं थज्याःगु प्रतिनिधि मण्डल नेवाः छ्वया हःगु खः धइगु नं भारतया विश्लेषण खनेदु।
प्रतिनिधि मण्डलं नेपालय् राष्ट्रपति डा. रामवरण यादव, प्रधानमन्त्री झलनाथ खनाल, माओवादी अध्यक्ष प्रचण्डलिसें कांग्रेस व एमालेया नेतात नं नापलाइगु ग्वसाः दु ।