छम्ह सभासद् ज्वनेत झिंनिखा छेँय् छापा
येँ (सन्ध्या टाइम्स)/देय्या संविधान निर्माण यायेत व राज्य संचालन यायेत नेपाःमि जनतां त्याकाः छ्वया हःम्ह छम्ह सभासद् थौंकन्हय् प्रहरीं ज्वनी धकाः थःहे बिसिउँ जुयाच्वंगु दु धायेबलय् पत्याः जुइ थाकुइफु। तर नेपाःया सर्लाही जिल्लाय् धाःसा अज्याःगु पत्याः जुइ थाकुगु थाकुगु घटना धाथें हे जुयाच्वंगु दु ।
कुटनीतिक पासपोर्ट मिउगु काण्डय् नां वयाच्वंम्ह सभासद् शिवपुजन राय थौंकन्हय् 'फरार' जुयाच्वंगु दुसा वयात ज्वनेगु लागिं नेपाल प्रहरी पालिंनिसेंया बः पिकयाः लगे जुयाच्वंगु दु। वयात ज्वनेत वंगु चान्हय् प्रहरीं सर्लाहीया गढैया गाविसया बिर्ता तवाल धाःगु थासय् झिंनिखा छेँय् छापा मारे यात तर ज्वने धाःसा मफु। सभासद् राय थःगु छेँय् वःगु सुचंया आधारय् प्रहरीं अन छापा मारे याःगु खः ।
रायया छेँ सदरमुकाम मलंगवां अथे हे २० किलोमिटर तापाः। बिर्ता त्वालय् रायया एकछत्र प्रभाव दुगुलिं अन छापा मारे यानां नं वयात ज्वने मफुगु खँ प्रहरीं धाःगु दु। प्रहरीं उगु थासय् छापा मारे याःगु थ्व स्वक्वःखुसी खः। तर राय भारीय सीमा लागा जुयाः भारतपाखे बिसिउँ वंगु अनुमान याःगु दु। तर फरार खःसां रायं जिल्लाया थीथी सरकारी नापं मेमेगु कार्यालयया प्रमुखतय्त फोन यानाः फलाना फलाना ज्या याना बिउ धकाः दबाव बीगु यानाच्वंगु दु। पासपोर्ट दुरुपयोग काण्डय् नां पिहां वःम्ह राययात ज्वनेगु लागिं येँया प्रहरीं जिल्ला प्रहरीयात पौ नं छ्वयेधुंकूगु दु ।
