मां, कलाः, कायम्ह्याय् स्याःम्ह ज्वन
येँ (सन्ध्या टाइम्स)/थः मां, कलाः व काय म्ह्याय्यात छेँय् स्यानाः बिसिउँ वनाच्वंम्ह कञ्चनपुर जिल्लाया भीमदत्त नगरपालिका वडा नं. ९ स्थित मटेनाया धर्मानन्द नाथयात म्हिगः बहनी प्रहरीं ज्वंगु दु। नाथं थः मां ५० दँ दुम्ह हरियादेवी नाथ, २५ दँ दुम्ह कलाः धनादेवी, खुदँ दुम्ह काय रवि व प्यदँ दुम्ह म्ह्याय् रेनुकायात स्यानागु खः धकाः स्वीकार यायेधुंकूगु दु ।
थःगु परिवारया भ्वछिसितं स्यानाः बेपत्ता जुयाच्वंम्ह धर्मानन्द नाथयात म्हिगः बहनी गांया लिकसं च्वंगु खुसि सिथय् च्वनाच्वंगु अवस्थाय् प्रहरीं ज्वना हःगु खः।
वंगु आइतवाः नाथं छेँय् च्वंपिं फुकसितं स्यानाः जंगलय् बिसिउँ वनाच्वंगु खः। वयात सीमा प्रहरी चौकी ब्रम्हदेवया इञ्चार्ज नरेन्द्र बहादुर चन्दया पुचलं ज्वंगु खः। नाथ मानसिक अवस्था ठिक मजूम्ह खः धाःगु दु ।
