बसन्तपुली सांस्कृतिक पुचःया सांस्कृतिक ज्याझ्वः

येँ (सन्ध्या टाइम्स)/नकतिनि नीस्वंगु नेवाः सांस्कृतिक पुचः न्यतपाखें थःपिनि पुचःया घोषणा लिसें सायाःया लसताय् सांस्कृतिक ज्याझ्वः यात। बसन्तपूया महाद्यः-पार्वती दबुली पुचःया नकिं सुनिता महर्जनया सभापतित्वय् जूगु उगु ज्याझ्वलय् तना वनाच्वंगु नेवाःतय्गु सांस्कृतिक बाजं व सापारुया ख्यालः थेंजाःगु सांस्कृतिक व परम्परायात संरक्षण व निरन्तरता बीगु ताःतयाः थीथी ब्वज्या जूगु खः ।

ज्याझ्वलय् थौंकन्हय्या राजनीतिक अवस्थायात व्यंग्य यासें "वँय्सू" नांगु ख्यालः नं न्ह्यब्वःगु खः। अथे हे उगु ज्याझ्वलय् नेवाः आर्केष्ट्रा कथं नटराज द इन्ष्ट्रुमेन्टल ब्याण्ड, म्यूजिक आर्ट कल्चर एज डिभाइन अफ नेपाल (म्याकडन), झीगु नासः खलः व पुचःपाखें न्ह्यब्वःगु खःसा नेवाः हुलाप्याखं, डान्स कल्चरल आर्ट सेन्टर, सुभद्रा स्थापित, नेपाः डान्स एकेडेमी, रेना-रविता-रविला महर्जन, प्रथमाञ्जली नासः खलःपिसं न्ह्यब्वयादीगु खः। अथेहे म्ये हालामि भाजुपिं छसिकथं सरोज बुद्धाचार्य व मानकृष्ण वावापिसं न्ह्यइपुक म्ये न्यंकादीगु खः। न्हूम्ह प्रतिभा राजु शाहीं भु व हासा पतिंचाय् चाःहुइकाः थःगु न्हूकथंया प्रतिभा न्ह्यब्वयादीगु खः ।

ज्याझ्वलय् विशेष पाहां कथं झाःम्ह ज्यापु महागुथि महानगर कमिटीया नायः ई. मोहन कृष्ण डंगोल, बाजं गुरुपिं शेषनारायण महर्जन व सूर्य नारायण महर्जनपिंसं थःथःगु बिचाः तयादीगु खः। ज्याझ्वः आपालं स्वकुमितय्सं रुचीपूर्वक स्वःगु खः ।

थुगु संस्थां निदँ न्ह्यवंनिसं थीथी विषयय् तालिम नं बिया वयाच्वंगु खःसा धिमे व बाँसुरीया तालिम क्वचायेके धुंकूगु दु। आः पछिमा स्यनेत्यनागु खँ ग्वसाः खलकं धाःगु दु ।