यल व खोनाय् परम्परागत मतयाः
यल (सन्ध्या टाइम्स)/परम्परां निसें न्ह्याना वयाच्वंगु बुंगया मतयाः वंगु शनिवाः गुंपुन्हि कुन्हुनिसें न्ह्यात। मतयाः बुंगद्यःया बाहालं बुंगद्यःयात न्हापां थीथी वस्तु छाये धुंकाः नायः बाजं, काहाः, न्यकू, धाः गुरुजुपिं छसिकथं अनं लिपा सर्वसाधारणपिं च्वनाः न्ह्याकेगु याइ। मुक्कं स्वघौ देय् चाःहिले माःगु मतयाः बुंगद्यःया बाहालं विहार लगायत देय्या फुक्क बहाःबही चाःहिलाः बुंगद्यः बाहालय् हे वयाः मतयाः क्वचायेकेगु याइ ।
मदुपिनि सद्गति लायेमा धयागु कामनां न्ह्याकीगु थुगु ज्याझ्वलय् इच्छा दुपिं न्ह्याम्हेसिनं ब्वति काःसां जिउ। मत च्याकेगु, इच्छा कथं कय्गू, अचार, खीर, साखःति लगायतया न्ह्यागु वस्तु छाःसां जिउ। परम्परायात निरन्तरता बीगु आज्जुं भिंन्यादँ न्ह्यवंनिसें न्यकू बाजा खलकं व्यवस्थापन याना वयाच्वंगु दु ।
गुंपुन्हि कुन्हु खोनाय् मतयाः न्ह्याःगु खःसा यलय् दुतिया कुन्हु मतयाः पिहां वःगु खः। यलय् सापारुया पलेसा मतयाः वइगु खः ।
