आदिवासी युवातय् भूमिका
युवा दिवस
येँ (सन्ध्या टाइम्स)/एशियाली युवा केन्द्र नेपालं त्रिपुरेश्वर पार्टी प्यालेस (वर्ल्ड टेड सेन्टर)य् 'संघीय राज्यय् आदिवासी युवातय्गु भूमिका' विषयय् छगू अन्तर्क्रिया यात। ज्याझ्वलय् नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं संघीय राज्य व्यवस्था माःगु मू कारण छु खः धइगु बारे ध्वाथुइकादिल ।
वय्कलं संघीय राज्य उत्पीडनय् लाःपिं आदिवासी जनजातितय्गु निंतिं माःगु खः धासें आःया राज्य छगू जाति छगू भाषाया जक पहुँच दुगु कारणं राज्य सञ्चालन पक्षपाती जुयाच्वंगु द्वपं बियादिल ।
नेकपा (एमाले)या केन्द्रीय दुजः कृष्णगोपाल श्रेष्ठं पार्टी दुने ल्याय्म्हतय्त थाय् बीमाःगु खँय् बः बियादिल। नेपाली कांग्रेस येँ जिल्ला सभापति भीमसेनदास प्रधानं ल्याय्म्हत राजनीतिइ सक्रिय जुइमाःगु आवश्यकताया बारे अन कुलादिल ।
नेवाः जागरण मञ्चया संयोजक सुजीव बज्राचार्यं संघीय राज्य सफल यायेगु नितिं आदिवासी युवातय्गु भूमिका दकलय् महत्वपूर्ण जुइगु बिचाः प्वंकादिल। एसियाली युवा केन्द्र नेपालया नकिं रेणु तुलाधरया सभापतित्वय् जूगु उगु ज्याझ्वलय् केन्द्रया शान्तराज मुल्मीं लसकुस यानादीगु खः। ज्याझ्वलय् थीथी क्याम्पसया विद्यार्थी व मिसातय्सं ब्वति काःगु खः ।
येँ (सन्ध्या टाइम्स)/वंगु अगष्ट १२ कुन्हु अन्तर्राष्ट्रिय युवा दिवसया लसताय् टीम नेपाल नांगु संस्थां अन्तरस्कूल च्वखँ धेंधेंबल्लाः यात। टीम नेपालया अध्यक्ष प्रदीप बज्राचार्यया सभापतित्वय् न्ह्याःगु उगु कासा खस नेपाली व अंग्रेजी भासं जूगु खः ।
कासाय् नेपालीपाखे ज्ञानोदय बालवाटिका उच्च मा.वि.या पलिस्था मानन्धर न्हाप, आदर्श योगहरि उच्च मा.वि.या सूचना घिमिरे लिउ, होली गार्डन बोर्डिङ्ग हाइस्कूलया प्रविज्ञ मानन्धर लियांलिउ व चाँदवाग स्कूलया निखिल भट्टं हःपाः सिरपाः त्याकूगु खः। अंग्रेजीपाखे अरनिको बोर्डिङ्ग स्कूलया प्रणभ प्रतिक न्हाप, अरनिको उच्च मा.वि.या चाँदनी भण्डारी लिउ, बूढानिलकण्ठ स्कूलया प्रतीक्षा शर्मा लियांलिउ व ज्ञानोदय बालबाटिका उच्च मा.वि.या रुकमणि खरेलं हःपाः सिरपाः त्याकूगु खः। ज्याझ्वलय् नेपाल प्रज्ञा प्रतिष्ठानया कुलपति वैरागी काइँलां विजयी विद्यार्थीतय्त सिरपाः व दसिपौ इनादीगु खः ।
