राष्ट्रिय सरकार गठन याके बीगु एमाले पहल

नकतिनि राजीनामा बियादीम्ह प्रधानमन्त्री झलनाथ खनालं नेतृत्व यानादीगु पार्टीया लिसें संविधानसभाया स्वंगूगु तःधंगु शक्ति जुयाच्वंगु दल नेकपा (एमालें) आः जुइगु प्रधानमन्त्री पदया धेंधेंबल्लाखय् ब्वति मकायेगु धकाः निर्णय याःगु च्वछायेबहः जू। देशय् सहमतिया राष्ट्रिय सरकार गठन यायेगु ज्याय् तिबः जुइमा धकाः एमालें थज्याःगु निर्णय याःगु खः। थ्व इलय् देशय् सुनां नं बहुमतया सरकार गठन यायेगु खःसा उकी एमाले मदयेकं मगाः। वास्तवय् एमालें थ्वहे मदयेक मगाःगु पार्टी जूगु अवस्थाया लबः कासें स्वंगूगु शक्तिया दल खःसां निक्वः निक्वः तक सत्ताया लगाम थःगु ल्हातय् कायेधुंकूगु दु। निक्वः निक्वः तक सत्ताय् थ्यंकेधुंकाः सम्भवतः एमालें थ्व बांलाक हे वाःचायेकल जुइमाः कि आः देशयात धाथें वर्तमान अन्यौलतां मुक्त यायेगु खःसा राष्ट्रिय सहमतिया सरकार हे गठन मयासें मगाः। अज्याःगु सरकारया नेतृत्व माओवादी वा कांग्रेस न्ह्याम्हेस्यां याःसां एमालेयात स्वीकार दु धासें एमालें थःपिनि परिपक्व राजनीति न्ह्यःने तःगु दु। तःधंगु दल जूगु ल्याखं माओवादी व कांग्रेसं उकिया पहल कायेमाः व अज्याःगु पहलय् थःपिं गनं नं बाधक जुइ मखु धासें एमालें देशयात धाथें हे अन्यौलतां मुक्त यायेगु चाहना न्ह्यब्वःगु दु। एमालें स्वंगूगु तर महत्वपूर्ण शक्ति खयां नं क्यंगु थ्व उदारतायात सही ढंगं उपयोग यायेगु जिम्मा आः माओवादी व कांग्रेसया ब्वहलय् वःगु दु। तःधंगु दलया हैसियतं आः माओवादी व कांग्रेसं नं अज्याःगु हे उदारता न्ह्यब्वयेमाःगु आवश्यकता दु गुकिं देशयात धाथें नं अन्यौलतां मुक्त यानाः शान्ति व संविधान निर्माणया ज्यायात सफल याना बी ।

More Stories Like this