अन्ना हजारेयात ज्वनायंकू कुन्हु हे त्वःतल

भारतय् भ्रष्टाचार विरोधी अभियानय् सक्रिय जुयाच्वनादीम्ह नागरिक समाजका न्ह्यलुवाः अन्ना हजारेयात अदालतं न्हय्न्हुया निंतिं न्यायिक हिरासतय् तयेत आदेस बिउगु खःसां वय्कःया मंगलवाः हे त्वःतुगु दु ।

दिल्लीया तिहाडय् अनसन च्वनादीम्ह अन्नायात प्रहरीं ज्वनाः विशेष अदालतय् पेश याःगु खःसा लिपा वय्कःयात मंगलवाः बहनी हे त्वःतुगु खः । अन्नां मुचुल्का बीत माने मजुइवं अदालतं न्हय्न्हुया लागि हिरासतय् तयेत आदेश बिउगु खः । अथेहे अन्नायात मंगलवाः ज्वंगुया विरोधय् आन्दोलनय् कुहांवःपिं झिंप्यसःम्ह प्रदर्शनकारीतय्त नं प्रहरीं ज्वंगु दु ।

जनलोकपाल विधेयकया समर्थनय् अन्नां मंगलवाःनिसें हाकनं आमरण अनशन शुरु यानादीगु खः । अन्नां अहिंसात्मक ढंगं आन्दोलन यायेत थः समर्थकतय्त इनाप यानादीगु खः । अन्नां हिरासतय् हे नं अनशन च्वनेगु खँ धयादीगु खः । आः त्वःतेधुंकाः नं अनसन धाःसा जारी हे यायेगु खँ धयादीगु दु ।

थ्वस्वयां न्ह्यः भ्रस्टाचार विरुद्ध दिल्लीइ थः द्वलंद्वः समर्थकत लिसें अनसनय् च्वंम्ह योग गुरु रामदेवया ज्याझवःयात नं प्रहरीं तितरबितर याःगु खः ।

More Stories Like this