सहमतीय देउवा, बहुमतीय पौडेल
देउवां अविश्वासया प्रस्ताव दर्ता मयाइगु जुल
येँ (सन्ध्या टाइम्स)/प्रधानमन्त्री झलनाथ खनालं राजीनामा बियादीवं न्हूम्ह प्रधानमन्त्रीया उम्मेदवार जुइगु निंतिं नेपाली कांग्रेसय् बरिष्ठ नेता शेरबहादुर देउवा व संसदीय दलया नेता रामचन्द्र पौडेल दथुइ पिहां वःगु ल्वापु आः तत्कालया निंतिं ज्यंगु दु ।
थौं सुथय् पार्टी सभापति सुशील कोइरालाया छेँ महाराजगञ्जय् निम्ह नेतातय् दथुइ जूगु वार्ताय् देउवां संसदीय दलया नेतापाखें चीकेगु लागिं पौडेल विरुद्ध हयेगु धकाः तयारी यानाच्वंगु अविश्वासया प्रस्ताव महयेगु, सरकारया नेतृत्व यायेगु सवालय् सहमतीय राष्ट्रिय सरकार दयेकेगु जुल धाःसा देउवायात उम्मेदवार दयेकेगु, बहुमतीय प्रणाली कथं चुनावय् वने माःगु जुल धाःसा पौडेलयात उम्मेदवार दयेकेगु सहमति जूगु खः।
स्वम्ह नेता दथुइ जूगु वार्तापाखें देउवां अविश्वासया प्रस्ताव मतयेगु धकाः सहमति याःगुलिं देउवा पक्षया नेता व सांसदत धाःसा तम्वःगु दु। देउवा पक्षया सांसदतय्सं पौडेल विरुद्ध अविश्वासया प्रस्ताव तयेगु नितिं तयारी नापं यानाच्वने धुंकूगु खः ।
पार्टीया शीर्ष नेतातय्गु बैठकं अविश्वासया प्रस्ताव दर्ता मयायेगु सहमति यात धकाः महामन्त्री कृष्णप्रसाद सिटौलां कोइराला निवासय् मुनाच्वंपिं संचारकर्मीतय्त जानकारी बियादीगु दु। वय्कलं सहमतीय प्रणालीं वनीगु जुल धाःसा देउवा अले बहुमतीय प्रणालीं वनीगु जुल धाःसा पौडेल हे उम्मेदवार जुयादीगु जानकारी नं बियादीगु खः।
कांग्रेसया विधान कथं प्रधानमन्त्रीया उम्मेदवार जुइगु निंतिं संसदीय दलया नेता जुइमाः। उकिं देउवां दलया नेता हे चीकेगु ताः तयाः बहुमत सांसद्तय्गु ल्हाःचिं तकं मुंकेधुंकूगु खः। देउवाया उगु पहलया कारणं कांग्रेस दुने ल्वापु पिहां वःगु खः। कांग्रेस नेतातय् दथुइ आः सरकारया नेतृत्व यायेगु पाः कांग्रेसयागु हे खः धकाः दावी यासें सकलें छप्पँ जुयाः न्ह्याः वनेगु निर्णय नं जूगु दु ।
पार्टीया शीर्ष नेतातय् दथुइ जूगु वार्तां थज्याःगु निर्णय पिकाःगुलिं कांग्रेस संसदीय दलया ज्याकुथी च्वनाः छु लिच्वः वइ धकाः पियाच्वंपिं देउवा पक्षीय नेतात तसकं तम्वःगु व उमित सम्झे यायेत तकं मेपिं थाकुगु खँ धाःगु दु। उमित खँ थुइकेगु निंतिं स्वय्म शेरबहादुर देउवा, महामन्त्री कृष्णप्रसाद सिटौला, नेता अर्जुन नरसिंह केसीपिंत तसकं थाकुगु खः ।
